Chandigarh, Nailur:
U Myntri Rangbah ka jylla u Bhagwant Mann ha kine ki khyndiat sngi jong ka taïew ba la lah, u la thaw ïa ka komiti kaba donbor bha kaba kynthup ïa lai ngut ki ophisar ba hakhliehduh jong ka jylla ban peit ïa ki kam ai jingïarap bad jingpyllait im ha ki distrik ba shah ktah ha ka jingshlei um jong ka jylla man ka sngi.
Haba pynïaid ïa ka jingïalang ba hakhliehduh ban bishar bniah ïa ka jinglong jingman jong ka jingshlei um, u Mann u la ong ba ka komiti kaba kynthup ïa ki ophisar ba rangbah jong ka tnad khajna, ka um, bad ka tnad marbam bad ki marbam mardih kan sah beit ha Amritsar bad kiwei kiwei ki distrik kiba shah ktah ha ka jingshlei um.
U la kyrpad ïa ki Deputy Commissioner bad kiwei kiwei ki ophisar ban pynthikna ba ïa ki jingbthah jong kane ka komiti yn pyntreikam hok ban ai jingïarap ïa ki briew kiba shah ktah ha ka jingshlei um.
U la ong ba ka sorkar jylla ka shimkhia pura ban pyllait im ïa ki briew ha kane ka kynta jong ka jingeh.
U Mann u la kyrpad ruh ïa u Chief Secretary ban leit jngoh ïa ki jaka ba la shah ktah ha ka jingshlei um bad ban pynthikna ba ka kam ai jingïarap bad jingpyllait im kan ïaid beit ïaid ryntih.
“Ka jingtuid kaba jur jong ka um na ki jaka lum ka la wanrah ïa ka jingma ïa ka jylla. Haduh mynta, la ïoh ïa ka um kaba 14.11 lak Cusec ha ka wah Ravi. Kane ka dei ka jingtuid kaba heh tam kaba ka jylla ka la ïoh namar ka long 11.20 lak Cusec ha ka por ba ka jylla ka la sakhi ïa ka jingshlei um kaba jur ha u snem1988,” u la bynrap.
U Mann u la ong ba ka sorkar jylla ka la dep ban thoh sha ka jylla Haryana bad Rajasthan ban weng ïa ka um kaba heh tam na ki wah.
U la ong ba ki shipai India ki la dep ban buh ha ki san tylli ki district kiba la shah ktah ha ka jingshlei um bad ki dang pynlong ïa ka jingpyllait im ryngkat ïa ki lanot ha ryngkat ka bor synshar da kaba pyndonkam da ki tiar bad ki mashin kiba thymmai.
Kumjuh ruh, la phah 17 tylli ki kynhun jong ka NDRF na ka bynta ki lad jingïarap.
La pyntip sha u Myntri Rangbah ba ki jingtreikam ba bteng ha kane ka thaiñ ki dang ïaid shakhmat ban pynkynriah ïa ki briew kiba sahkut ha ka jingshlei um, ban bishar bniah ïa ka jingjulor namar ka jingshlei um, bad ban peit bniah ïa ka jingpur jong ka jingpang, ha kylleng ki jaka ba shah ktah ha ka jingshlei um.
U la bthah ba dei ban khang ïa ki thliew kiba don harud ki wah kiba la shlei um bad ba ki kynhun sumar ki dei ban ai jingsumar ban ïada na ki jingpang haman la ki shnong.
U la ong ba ryngkat bad ki kam ai jingïarap, ki kynhun ki dei ban long kiba la khreh ban shim ïa ka jingshim nuksa um, ka jingsynreit um shabar bad hapoh ïing, ka jingpynkhuid ïa ka um, ka jingpeit bniah ïa ka jingshit, kaba Test ïa ki Card ban lap ïa ka jingpang Malaria bad Dengue ha ka por kaba biang, ka jingsam ïa ki Sanitary Napkin bad ki musari ha ki por ban wan.
U Myntri Rangbah u la ong ba ka tnad sam um bad pynkhuid um ka dei ban pynbor ïa ki kali tan um na ka bynta ban pynbiang ïa ka um dih kaba khuid bad kaba lah ban dih ha ki shnong ki thaw haduh ban da biang pura ka jingpynbiang lyngba ki skhim sam um.
Kumjuh ruh ki kynhun Test um ki dei ban peit bniah ïa ka jinglong ka um ha baroh ki shnong khnang ban lait na kano kano ka jingpang khlam.
U la ong ba nalor ka um, dei ban pynbiang ïa ki jingbam rkhiang, ka shini, u khaw, u ata, ka khi bad u dud Powder sha ki paidbah ha ki shnong kiba shah ktah na ka jingshlei um.
La bthah ïa ka Mandi Board bad ka PWD (B&R) ban leh ïa ka jingjurip bniah ïa ka jingheh jong ka jingjulor jong ki jingkieng, ki surok, bad ki ïing sorkar ha ki jaka ba shah ktah ha ka jingshlei um.
