Islamabad, Nailur:
Katkum ki khubor, la iathuh ba 25 ngut ki la duh ei noh ia la ka jingim ha ka jingthombor jong ki lehnoh ha Pakistan ha ka Sngi Ba-ar, kynthup ia 14 ngut kiba khlad hashen, hadien ba uwei u ‘riew kheiñduh u la leit pynbthei bom ha ka jaka paidbah katba dang don ka jingialang paidbah jong ki seng saiñ pyrthei ha ka thaiñ Southwest jong ka Balochistan.
La ong ba da ki phew ngut ki briew ki la mynsaw ha katei ka jingbthei bom, kaba la jia ha ka jaka ieng kali jong kawei ka madan ialehkai ha ka nongbah Quetta, ha kaba da ki spah ngut ki dkhot jong ka Balochistan National Party (BNP), ki la ia lum lang, ong arngut ki heh sorkar jong katei ka Jylla, kiba ai jingkren khlem da pynpaw kyrteng.
Ym duna ia ka hynñiew ngut na kiba mynsaw, ki don ha ka jingma kaba khraw kaba ap ia ka jingim jongki.
Kawei pat ka jinghiar thma ha Balochistan, kaba don hajan khappud bad ka Iran, ka la shim ia 5 ngut ki mynsiem briew ha ka Sngi Ba-ar, katba ki 6 ngut ki shipai pat, ki la kyllon iap hapdeng ka jingleit hiar thma sha ki ktem lehnoh kiba don ha ka thaiñ Khyber Pakhtunkhwa.
Ka Balochistan ka dei ka jylla kaba heh tam bad kaba riewspah tam ha ki marpoh khyndew jong ka Pakistan, hynrei ka dei ruh kaba duk tam, bad ka ju don ha ka kyrdan kaba rit tam ha ki scorecard jong ka jingroi jingpar jong u briew.
Ka BNP ka ialap ha ka rynsan kaba khot ia ki hok kiba kham heh bad ka jingbei tyngka ha ka ioh ka kot na ka bynta ka jingbha jingmiat jong ki dkhot jong ka jaitbynriew Baloch.
U heh jong katei ka seng, U Akhtar Mengal, u dang shu dep kren ha katei ka jingialang ha Quetta bad u dang mih na katei ka jaka, ha ka por ba katei ka jingshah thombor, ka la jia. U la ong ba u long uba “shngain” ha ka jingthoh ha ka social media.
Naduh u snem 2014, ka China ka la bei tyngka shibun ha kaba shna ia ka projek surok-bad-ki jingtei ha Balochistan kaba iadei bad ka jingthmu jong ka One Belt One Road.
Hynrei bun ki Baloch ki ong ba ia ka jingmyntoi la kheit tang da ki briew kiba nabar.
Ki shipai Pakistan, ki la ïakhun pyrshah ïa ki kam lehnoh ha katei ka Jylla, la palat shisnem, bad ha u snem 2024, katei ka thaiñ, ka la ïohi ïa ka jingkiew kaba jur jong ki kam thombor, ha kaba 782ngut ki briew, ki la ïap.
