Hyderabad, Nailur:
Ka sorkar jylla Telangana ka la mynjur T.200 klur na ka bynta ki lad jingïarap ba mardor ha ki distrik ba shah ktah ha u slap bad ka jingshlei um. Na kane, mar 10 klur la mang sha ka Kamareddy, Medak, Nirmal, Adilabad, Nizamabad, Komaram Bheem Asifabad bad Rajanna Sircilla, katba kiwei pat ki 26 tylli kin ïoh mar T. 5 klur.
Ïa kane ka pisa yn pyndonkam na ka bynta ban maramot kyrkieh ïa ki surok, ki nala, ki jingkieng bad ban pynïoh biang ïa ka bording ha ki jaka ba la shah ktah. Ki hukum ki la pynshai ba ïa ka pisa ym lah ban pyndonkam na ka bynta ka jingsiew bai lutksan sha ka jingduhnong jong ki jingthung ne ka jingïarap pisa, ïa kaba yn sa pyllait kyrpang hadien ba la dep lum jingkheiñ.
Ha ka sngi Ba-ar, ïa ka jingïarap pisa la nang pynkiew shuh shuh sha ki longïing kiba la shah ktah ha ki jingshlei um ba dang shen ha Karimnagar distrik.
Uwei u nongshong shnong ïa uba la tip kyrteng kum u Pumpukadi Nagaiah u la jah rngai katba u dang ïaid lyngba ïa ka wah Manair hajan ka projek Upper Maneru ha Gambiraopet Mandal. Ka jingwad bniah jong ki bun tylli ki tnad ka dang ïaid shakhmat. U District Collector u Sandeep Kumar Jha u la aiti ïa ka Cheque kaba T.5 lak sha ka kurim jong u Nagaiah ka Laxmi kum ka jingïarap ka sorkar.
Ha ka shnong Lingannapet, ha kaba ki jingri ki la duh ei ha ka jingshlei um, u Collector u la sam mar T. 1 lak sha u Gaddamidi Manemma na ka bynta ar tylli ki masi bad T.50,000 sha u Praveen Goud na ka bynta kawei ka masi.
U Myntri ka tnad Labour & Mines uba dei ruh u MLA ka Chennur, u Gaddam Vivekanand, u la pynbna ha ka sngi Ba-ar ba yn ai jingïarap pisa sha man uwei pa uwei u nongrep uba la julor ki jingthung jingtep na ka daw jong u slap uba jur dang shen. U la leit ban jurip ïa ki lyngkha kiba la shah ktah ha ka district Mancherial, ha kaba la synran lang da u District Collector u Kumar Deepak, u DCP A Bhaskar bad kiwei ki heh sorkar.
Ki nongrep ki la pynpaw ïa ka jingsngewsih ba ki lyngkha jong ki ki la shah pynjot namar ka um kaba la pyllait na ka projek Kaleshwaram. U Vivekananda u la ong ba ki nongrep kiba la mad ïa ka jingduhnong namar ka jingtuid ka um na ka projek ha ki san snem ba la dep kin ïoh bai lutksan. U la kdew ba shwa kane ka projek, ki nongrep ha Chennur ki la ïoh ïa ka jingmih kaba kham heh haduh 70%, bad u la pynthikna ba yn ai ka jingsiew kaba hok ïa baroh kiba shah ktah mynta u snem. Ki nongrep ki la ïathuh ba kumba 200 akar eiei ki la shah pynjulor.
