Hyderabad, Nailur:
Ka heh nongïalam jong ka BRS bad ka MLC ka K Kavitha, ka khun jong u nongseng jong ka seng bad u Myntri Rangbah barim ka Telangana, ka la iehnohkam na ka jinglong dkhot ba nyngkong jong ka seng bad kumjuh ruh na ka kam jong ka ha ka ïingdorbar thawaiñ jong ka, ha ka sngi Balang, da kaba kynnoh ba ki para jong ka, u T Harish Rao bad u J Santosh Kumar, ki ïathmu ban ïasuhbuit sniew kum shi bynta ban pyntlot ïa ka jingtreikam ka seng bad ban bat ïa ka jingsynshar na ka longïing u KCR.
Kane ka dei ka sien kaba nyngkong ba ka Kavitha kan kren paidbah hadien ba ka la shah beh na ka seng BRS.
Haba kren sha ki nongthoh khubor ha Telangana Jagruthi Headquarter, ka la kynnoh ba kawei ka bynta hapoh ka seng ka la thmu bad pynsaphriang ïa ki “jingpynbna lamler” pyrshah ïa ka.
Ka Kavitha ka la pynshisha ba u Harish Rao u la ïateh lok bad u Myntri Rangbah ka jylla u A Revanth Reddy bad u trei pyrshah ïa ka jingmyntoi jong ka longïing u KCR.
“Baroh arngut ki la leit da kajuh ka liengsuiñ ban leit sha Delhi dang shen bad ki la thmu pyrshah ïa ka longïing jong u KCR,” ka la ong bad bynrap ba u Harish Rao u la “ait noh ïalade ha u Revanth Reddy.”
Ka la dawa, “Balei ka sorkar ka thmu tang ïa u KTR?Balei kam don ka jingtohkit halor ki jingkynnoh pyrshah ïa u Harish Rao?” ka la ong.
Ka la kynnoh ba u Harish Rao u pyrshang ban kurup ïa ka seng na u KCR bad u KTR. “U Harish Rao um dei u nongpynmih jingeh. U dei u nongpynshit. U thaw jingkulmar hapoh ka seng bad u leh kum uba pynbeit ïa ka jingeh”, la kynnoh ka Kavitha.
“Watla nga trei shitom ha ka seng BRS hynrei nga shah beh namar ba nga ïakhun na ka bynta ki kam paidbah kum ki jingbhah kyrpang na ka bynta ki BC. Kumno kata ka long pyrshah seng?” ka la kylli.
Haba kren ha ka jingïalang bad ki nongthoh khubor hangne ha ryngkat ki nongkyrshan jong ka, ka MP barim ba 47 snem ka rta ka la kynnoh ïa u Harish Rao ba u don ka jingïasngewthuh jingmut kaba khyndiat bad u Myntri Rangbah ka jylla u A Revanth Reddy.
Ka MP barim jong ka Nizamabad ka la kynnoh shuh shuh ïa u hynmen jong ka bad u President ba mynta jong ka seng BRS u K T Rama Rao ba um shym la kyrshan ïa ka haba la pynlong ïa ka “jingïakhih ba sniew” pyrshah ïa ka. Ka la maham ba ka KTR ka dei ban “husiar” halor ki jingthmu ba la kynnoh ba u Harish Rao u la leh.
Ka Kavitha ka la kynnoh ruh ba u MP barim u J Santosh Kumar u la pyndonkam bakla ïa ka bor jong u ha ka ophis jong u Myntri Rangbah ka Jylla ha ka por ba u KCR u dang long Myntri Rangbah ka Jylla.
Haba kynnoh ba u Santosh Kumar u la “donkti ha ka jinglute lyngba ka jingtih shyiap,” ka la kynnoh: “Ki nongïarap bajan jong u Santosh Kumar – u Pochampally Srinivas Reddy, ryngkat bad u Krishna Reddy jong ka Megha Engineering and Infrastructure Limited (MEIL) – ki dang shna ïa ka projek villa kaba heh bha hajan Hyderabad ha ka jingmang kaba T. 700 klur. Nangno u Pochampally Srinivas Reddy u ïoh ïa kane ka pisa?” Ka Kavitha ka la dawa na ka sorkar Jylla ban tohkit halor kane ka kam da kaba bynrap, “U KCR bad u KTR ki dei ban husiar na u Harish Rao bad u Santosh Kumar.”
Ka la kynnoh shuh shuh ïa u Harish Rao bad u Santosh Kumar halor ka jingbamsap kaba katkum ka jingong jong ka, ka la ai daw ïa ka sorkar Congress “ban pynbna ïa ka jingtohkit CBI pyrshah ïa ka projek ai um ha Kaleshwaram.” Ka la kynnoh, “Ka jingtohkit ka dei na ka daw ka jingbamsap jong ki para, u Harish Rao bad u Santosh Kumar.”
Ka Kavitha ka la kam ruh ba u kpa jong ka u la mad ïa ka “jingpynbor” napoh ka seng ban leh pyrshah ïa ka. “Ngam ju angnud ïa kino kino ki kam.Nga phah ïa ka shithi iehnoh kam sha u Chairman jong ka Legislative Council. Nga phah ruh ïa ka jingiehnoh kam na ka jinglong dkhot ba nyngkong jong ka BRS sha u KCR”, ka la ong, ha ka jingai jingkren ha ka jingdon ryngkat ki nongkyrshan jong ka.
