Shillong, Nailur 05
Ka India ka la sdang ïa ka jingjop ha ka AFC U23 Asian Cup 2026 Qualifiers hadien ba ka la lah ban pynliem noh ïa ka Bahrain da 2-0 kol ha ka sngi Balang ha Suheim Bin Hamad Stadium kaba ha Doha, Qatar.
Kane ka nam jop ka la wan urlong lyngba ki kol ba la thep da u Muhammed Suhail (32′) bad u Chingangbam Shivaldo Singh (90+5′) na ka bynta ban pynlong ïa ka India ban khur ïa ki lai point ha ka Group-H.
Ha ka jingïalehkai la sakhi ïa ka jingïakhun haduh kaba kut ki 90 minit, ka India ka la pyrshang ban ïalehkai bha naduh kaba sdang. Kumjuh u rangïalehkai ka Bahrain u Mahmood Abdulla u la ïoh ïa ka kabu kaba biang eh hynrei u rangapkol ka India u Sahil u la lah ban pyllait na ka jingshah thep.
Hadien shiteng kynta ka India ka la ïoh ban pynkhih jar nyngkong eh lyngba u Muhammed Suhail. Kane ka shi kol ka la ïai neh haduh kaba kut jong ka kylla step na ka daw ka jingbym lah ban pynphai da ka liang pyrshah.
Hapdeng kane ka jingïakhun ka Bahrain ka la pyrshang ban ïakhun tyngeh ha kaba ka la ïoh ïa ki katto katne ki kabu kiba biang, hynrei kam shym la lah ban pynurlong.
U coach ka India u Naushad Moosa u la kylliang ïa katto katne ki rangïalehkai kiba kynthup ïa u Sreekuttan MS, Shivaldo, bad u Mohammed Aimen.
Hashwa ban wai ka India ka la lah ban pynurlong biang na ka bynta ban thep ïa ka kol kaba ar lymgba u Chingangbam Shivaldo Singh ha ka minit kaba 90+5 na ka bynta ban khur syndon ïa ka jingjop.
