Shillong, Nailur 07
Ka Meghalaya Football Association (MFA) ka la pynbna ba kan sdang noh ïa ka Meghalaya Women’s State League ha ka 20 tarik mynta u bnai bad ka jingplie ïa kane ka lympung yn pynlong ha SSA Stadium.
Ha kane ka lympung ïalehkai kaba nyngkong eh na ka bynta ki kynthei ha ka Jylla, yn sakhi ïa ka jingwan shim bynta da ki kynhun kiba kynsai ki ban mihkhmat na ki synjuk ïalehkai kiba la pynïasoh bad ka MFA. Kane ka long ka thong ban pynlong ïa kane ka lympung jong ki kynthei bad mynta ka dangsah sa tang ar taïew bad la kyrshan lang ïa kane ka lympung da ka Sorkar Jylla. Ka MWSL kan plie lad ruh ïa ki klob ka Jylla ban ïashim bynta ha ka sien kaba nyngkong ha ka Indian Women’s League second division (IWL 2).
Ka jingwanrah ïa ka MWSL ka long halor ka jingjop ka Meghalaya State League jong ki shynrang ïa kaba la ïoh jingkyrshan na ka Sorkar Jylla. Te kumta kito ki synjuk ïalehkai kiba la lah ban pynlong ïa ki lympung ïalehkai, ki lah ban phah ïa ki kynhun kiba la khur nam lahduh bad ba wan ba-ar sha katei ka lympung.
Ki don 13 tylli ki kynhun ki ban shim bynta na ki phra tylli ki synjuk kiba la pynïasoh sha ka MFA, ha kaba la phiah ïa ki ha ki lai tylli ki zone – kata ka Khliehriat, Shillong bad Tyrsad zone.
Kine ki kynhun ki long ka Na Rympei Football Academy bad ka Attacker Youth Club Pahamsyiem na Ri-Bhoi District Sports Association, Laitkor SC bad ka Pay For Right Football Academy na Shillong Sports Associa-tion, ka Jakrem SC bad ka Mawten SC na Mawkyr-wat District Sports Asso-ciation, ka Young Sports Social & Cultural Club bad ka Bright Future SSCC na Pyndengumïong District Sports Associa-tion, ka Diengshynrum SC na East Jaiñtia Hills Dis-trict Football Association, Mawlum Tyrsad SC bad Mawsawrit SC na Tyrsad Area Sports Association, Lapalang SSCC na Riwar Mihngi Football Associa-tion bad ka Chirupheiwei Nongkynrih FC na Laskein Block Sports Association.
