Shillong, Nailur 07
Ka jingïakhun hapdeng ka Laitkor SC pyrshah ïa ka Nongrim Hills ha ka lympung ïalehkai Shillong Premier League 2025 kaba la long ha SSA Stadium kaba ha First Ground, Polo ha ka sngi Saitjaiñ, ka la kut noh ha ka jingïakhaid da mar 2-2 kol.
Kum ka kynhun, lehse ka Nongrim Hills kan jin da la babe bha kam shim la lah ba kan khur ïa ka nam jop kaba nyngkong eh jong ka, ha kane ka samoi ïalehkai kaba mynta, hadien ba ka la lah arsien ba kan tam shakhmat, ha kaba ïa ki artylli ki kol ki jong ka la thep da u Banshemphang Kurbah (36′) bad u Isharwell Mukhim (49′), katba na ka liang ka Laitkor SC la thep da u Shanborlang Nongrum (45′) bad u Sandy Kharkongor (90’+2).
Watla katta ruh, ka Nongrim Hills ka la lah pat ba kan khur ïa ka shi point jong ka, katba na ka liang ka Laitkor SC ka la hap ba kan hun noh ban khur tang ïa ka shi point, kaba jia ryngkhat ba na ka syrngiew jong ka nam rem ba kan lah pat ba kan ïoh khur ïa ka shi point, na kane ka jingïakhun.
Ha kane ka janmiet jong kane ka jingïakhun u rangapkol ka Laitkor SC, u Deranius Wahlang u la lah ban kyrda ïa ki kato katne ki bol ba la khyrwit da ki rangïalehkai ka Nongrim Hills kum shi bynta ban khanglad ïa ki ban nym rung sha ka kol, hynrei ïa ka kol ba nyngkong ka Nongrim ba la shut da u Banshemphang, um shim la lah ban leh eiei satang ba un shi khmih ïa ka jingkhih jong ka jar, pynban shwa ba ka jingïakhun kan jam sha ka jingïashong thait, ka Laitkor ka la ïoh ïa ka kabu ksiar ban pynphai noh ïa kane ka shi kol ba ka la shah tam, lyngba u Shanborlang, uba la khyrwit jam bha ïa ka bol kaba sam lyngba ia u rangapkol ka Nongrim Hills u Ebenson Warbah.
Haba wan ban bteng ïa ka kylla miet, sa shisien, ka Nongrim Hills ka la lah ba kan tam biang shakhmat, bad ha ka minit kaba 55, u Banshemphang u la jan ïoh ïa ka kabu ban thep wat ïa ka kol kaba lai, lyngba ka free-kick, ïa kaba ka bol ka la her shabar ka dieng kol.
Hadien kane, ka jingïakhun hapdeng kine ki ar kynhun ha madan ka long kaba itynnad bha, bad ha ka minit ba kane ka jingïakhun kan khreh ban jam sha kaba kut u Sandy uba la wan mih na ka ben shong, u la ïoh ïa ka kabu ksiar ban khyrwit jam biang ïa ka bol tad haduh ba u Ebenson, um shim la lah shuh ban khanglad ïa ka bad ban pynlong ïa kane ka jingïakhun ba kan kut noh artad ha ka jingïakhaid.
Kumta ha kaba kut jong kane ka jingïakhun, ka Nongrim Hills kan ïai neh ha trai duh ka miej ïakheiñ point ha kaba ka la ïoh ban khur tang 1 point na ki saw sien ïakhun ba ka la dep, katba ka kynhun ïalehkai ka Laitkor SC kan kiew sha ka kyrdan kaba 6, ryngkat bad ka kynhun ïalehkai ka Mylliem hynrei ka jingïapher hapdeng kine ki ar kynhun ka long ha ka goal difference (-1 to +1).
Ka jingïakhun ha ka lah sngi U Blei kan long hadpeng ka Mawlai SC pyrshah ïa ka Malki SC, ha ka por 4:30 nohphai sngi.
