Washington, Nailur:
U President jong ka America, U Donald Trump ha ka Sngi Palei, ula ong ba un sa ia kren shen bad U Vladimir Putin jong ka Russia, hadien ba u la ia kren kham mynshwa ha kane ka sngi bad u paralok jong ka Ukraine, u Volodymyr Zelensky bad ki nongialam jong ka ri Europe.
“Ngan sa pyn-urlong, ho-oid” ong u Trump ha u nongthoh khubor haba kylli la un sa ïakren bad utei u nongïalam ka Kremlin ha ka por ban sa wan, ha shilynter jong ka jingïabam ja miet bad ki nongpynïaid ba pawkhmat jong ka US tech ha White House.
Namar la ong ba u Trump u la kular naduh shwa ban jop ia ka shuki President, ba tang mar ia ioh shong ha ka shuki President hi, un pynkut noh ia ka thma jong ka Russia bad Ukraine, kaba la neh mynta la 3 snem tam.
Hynrei, la bun ki bnai ki la ïaid, u Trump u la pyrshang ban pynjem ia ka Russia bad ka Ukraine da ki buit- ki lad baroh kat kiba u lah, phewse ka long kaba eh ia u ban wanrah ia ka jingiasuk hapdeng kine ki arliang ri, ha kaba u Trump u la shu pynngat kyndon naphang ia ka Russia ha ki liang ka khaïi- pateng jong katei ka ri bad watla katta ruh, ka US kam lah ban tehlakam ne pynsangeh ia ka jingleit tur ka Russia sha Ukraine.
Dei kane ka daw kaba la pynlong ia ka US ba kan pynshitom sa ia ka India, kaba long ka paralok bajan eh jong ka Russia, da kaba buh haduh 50% ka khajna ia ki mar khaïi jong ka India kiba dei ban shalan shabar ri.
