New Delhi, Nailur:
U Myntri Rangbahduh ka ri, u Narendra Modi, u la thmu ban leit jngoh ïa ki jylla kiba shah ktah ha ka jingshlei um, kiba dang shen ki la mad ïa ka jingshah pynjulor kaba jur bha namar ka jingjur slap bad ka jingshlei um, kaba la wanrah ïa ka jingduhnong kaba khraw ïa ki jingthung jingtep kiba dang khie, ki jingim briew, bad ki jingdon jingem.
Ka tyllong khubor kaba la wan na ka sorkar ha ka sngi Thohdieng ka la ai dak ba dang pynkhreh ïa ka plan na ka bynta ka jingleit jngoh jong u Modi sha kine ki jylla, ha kaba un bishar bad jurip bniah ïa ka jinglong jingman ryngkat bad ki sorkar jylla kiba ïadei.
Ka jingshlei um ka la pynduh ïa ka jingim briew, ki jingri jingdup, bad ki jingtei hadien ka jingjur jong u slap bad ka jingshlei um kaba mih na ka jingjur palat u slap ha Jammu & Kashmir, Punjab, Himachal Pradesh, Assam, Uttarakhand, bad katto katne kiwei pat ki jylla.
Napdeng ki jylla kiba la shah ktah jur eh, ki kynthup ïa ka Jammu & Kashmir bad ka Himachal Pradesh ki la kit ïa ka jingkit kaba khia jong kane ka jingshah lynshop.
Ki tyllong khubor ki la bynrap shuh shuh ba u Myntri Rangbah, ryngkat bad ki Myntri Rangbah jong ki jylla ba ïadei, u lah ruh ban pynlong ïa ka jingjurip na suiñ ïa ki jaka ba shah ktah ha ka jingshlei um.
Ka Punjab, kaba la synshar da ka Aam Aadmi Party, ka dei ka jylla, kaba la shah ktah jur bha, ha kaba palat 1,900 tylli ki shnong, ki la shah ktah jur bad palat 300,000 ngut ki briew, ki la duh jaka sah namar ka jingshlei um.
Ka Haryana ruh ka la mad ïa ka jingshlei um kaba jur bha, kaba long kum kiwei pat ki bynta jong ka Uttar Pradesh, Bihar, Andhra Pradesh, Odisha, bad ki jylla bapher bapher jong ka ri India.
Ka jingtwa khyndew bad ka jingtwa jong ki ïing ha ki jaka lum jong ka Himachal Pradesh, Jammu & Kashmir, bad kiwei kiwei ki jylla, kaba la mih na ka jingther u slap bad ka jingjur jong u slap ba ïai bteng, ka la pynduh ïa kiba bun ki mynsiem briew.
Na ka liang ki sorkar jylla ki la ïaleh katba lah ban wanrah ïa ka jingshngaiñ bad ka jingïarap kaba kyrkieh sha ki baroh ki lanot shlei um ha kylleng ki thaiñ.
