Ranchi, Nailur:
Ka Bharat Rashtra Samithi (BRS) ka la kiar na ka jingthep vote ha ka ilekshon Vice President hynnin ka sngi namar ka jingeh jong ki nongrep ha Telangana bad ka jingïakynad jong ka bad baroh ar tylli ki seng BJP bad Congress, ong u nongïalam ka seng u KR Suresh Reddy ha ka jingïakren bad ki nongthoh khubor.
Katkum ka jingong jong u Reddy, ki nongrep ha Telangana ki la mad ïa ka jingeh ha kaba ïadei bad ki sboh, na ka bynta kaba ki la ujor sha ka sorkar pdeng ban wad ïa ka lad ban pynbeit, hynrei “kam shym la leh ei ei”.
“Ha kine ki taïew ba la dep, ki nongrep ka Telangana ki la mad ïa ka jingeh ha kaba ïadei bad ki sboh, khamtam ïa ka urea. Ngi la kyrpad ïa ka sorkar pdeng bad ka sorkar jylla Telangana bunsien ban pynbeit ïa kane ka jingeh. Hynrei kam shym leh eiei. Kumjuh ruh, ki nongïalam ka BJP ha Telangana ki la ong ba kim donkam ïa ka jingkyrshan jong ka BRS na ka bynta ka ilekshon President,” u la ong.
Ha kawei pat ka liang, ka sorkar jylla ba synshar da ka Congress ha Telangana ka la ïai bteng ban leh ïa ki kam ki bym donkam pyrshah ïa ki nongbud ka BRS, la ong u Reddy.
“Kane ka dei ka daw ba ki nongïalam ka BRS ki la rai ban ym ïashim bynta ha ka ilekshon Vice President. Ngi tip ba ka jingïashim bynta jong ngi ha ka jingthep vote kan ym ktah than ïa ka jingmih jong ka ilekshon, hynrei lyngba kane ka rai, ngi kwah ban buh ïa ka jingeh jong ki nongrep ka elangana ha khmat ka ri. Ngi kyrmen ba ngin jop thikna ha kane ka jingpyrshang,” u la ong.
