Chandigarh, Nailur:
Ha shwa ka jingleit jngoh jong u Myntri Rangbahduh sha ki jaka ba shah ktah na ka jingshlei um ha Punjab, u Myntri ka tnat ka koit ka Khiah, u Balbir Singh ha ka lah sngi U Blei u la pynpaw pyrthei ïa ka jingjulor kaba khraw kaba la wanrah da ka jingshlei um kaba dang shen ha ki jaka sumar ba kongsan jong ka jylla, ha kaba ka jingkheiñ kaba nyngkong ka long haduh T. 780 klur.
Haba kren sha ki lad pathai khubor ha Punjab Bhawan, u Balbir Singh u la pynpaw ba ka jingshlei um ka la ktah jur ïa ka tnad ka koit ka khiah jong ka jylla, kaba la pynjulor haduh katta katta ïa ki jaka ai jingsumar ha kylleng ka jylla.
U Myntri ka koit ka khiah, u la pyntip ba ka jingshlei um ka la pynjulor ïa ki dawai kiba shongdor haduh T.130 klur, nalor ki 1,280 tylli ki Dispensary bad ki jaka ai jingsumar, 101 tylli ki jaka sumar paidbah, bad 31 tylli na ki 41 tylli ki sub-divisional hospital jong ka jylla ki la shah pynjulor bha, kaba la lum haduh T. 780.
“Wat hapdeng kane ka jingshah pynjulor kaba ym pat ju jia mynno mynno ruh, ka tnad ka koit ka khiah, naduh kiba bat ïa ka kyrdan Principal Secretary haduh ki nongtrei ASHA, ki la shakri khlem sangeh ha ki jaka ba la shah pynjulor ha ka jingshlei um,” u la ong, da kaba bynrap, “Ki kynhun sumar jong ngi ki la pyndonkam ïa ki lad ki lynti baroh, la ka long da ki kali kit nongpang ne ki lieng ne ki briew kiba donkam ban pynbiang ïa ki nongsumar.”
U Balbir Singh u la pynpaw ba u la dep thoh sha u Myntri ka koit ka khiah ka sorkar pdeng, u JP Nadda, da kaba batai bniah ïa ka jingktah kaba shyrkhei bad pan jingïarap pisa mardor na ka bynta ka tnad ka koit ka khiah. Mynta u kyrpad beit beit sha u Myntri Rangbahduh, uba la buh por ban leit sha Punjab mynta ka sngi.
“U budlum jong ka koit ka khiah ha nongkyndong bad sor jong ka Punjab ka la shah pynduh. Kane kam dei tang shaphang ki jingtei; ka dei shaphang ka jingduh noh ïa ki tiar ba pyllait im, ki dawai ba kongsan, bad ki jaka ha kaba da ki million ngut ki nong Punjab ki wad jingsumar. Ngi pdiang sngewbha ïa ka jingwan jngoh jong u Myntri Rangbahduh, hynrei ngi donkam ïa ka jingïarap kaba kyrkieh kaba kham palat ïa ka jingleh isynei, ngi donkam kham bun ki jingkyrshan. Ngi la donkam mynta la kumno kumno T. 20,000 klur ban tei pat ïa ki jingtei ba kongsan bad ka jingpynbha pura ïa ka jylla, ” ong u Balbir Singh.
