Hyderabad, Nailur:
U Myntri ka tnat Excise jong ka Telangana, u Jupally Krishna Rao, u la bthah ïa ki heh sorkar, ba kin ai ïa ka kaiphod kaba bniah, hapoh 24 kynta, hadien ba ki pulit jong ka Maharashtra, ki la ïoh ban lap ïa kawei ka jaka shna dawai Mephedrone ba la pyntreikam beaiñ ha Cherlapally ha Hyderabad.
Katkum ka jingpynbna paidbah, u Rao u la kylli jingkylli na ki heh jong ka tnad halor katei ka jingjia bad u la kylli kumno kum kane ka jingtreikam ka lah ban don khlem da lap. “Kaei kaba ka tnad Excise jong ka Telangana ka la leh?” u la kylli, da kaba pynpaw ïa ka jingsngewkhia kaba jur halor ka jingbym lah ban lap ïa ka jingtreikam jong u drok ha ka thaiñ, la ïathuh kawei na ki tnat pathai khubor .
U la bthah ïa ki heh sorkar ban leit jngoh mardor ïa katei ka jaka, ban ai ïa ka kaiphod kaba bniah, bad ban pynkhreh ïa ka plan treikam kaba bniah ban ïada biang na kum kine ki jingjia.
U la khot ruh ban pynkhlaiñ ïa ka jingpeitngor halor ka jingdih, jingkit, bad ki jingpynpoi ïa ki dawai kiba ïadei bad ki dawai pynbuaid, kynthup ïa ka jingpeitngor ïa ki jingïadei hapdeng ki nongdie bad ki nongthied.
Hadien ka jingbthah jong u, ki heh jong ka tnad Excise ki la leit jngoh ïa katei ka unit ha ka lah sngi U Blei bad la khmih lynti ba kin aiti ha ka por ba biang.
Ha kajuh ka por, ka Telangana Drugs Control Administration ka la pynshai ba kane ka unit ba la kdew ka dei ka karkhana shna dawai, kam dei Pharmaceutical Company ba ïoh license.
Ka tnad ka la pynpaw ba kane ka kam ka hap hapoh ka jingpeit jong ki bor pyntreikam kum ki pulit, ki tnad pynïaid drok (NCB), ka Directorate of Revenue Intelligence (DRI), bad kiwei kiwei ki tnad jong ka jylla bad ka sorkar pdeng kiba la ai bor katkum ka NDPS Act, 1985, ong kawei na ki kynhun pathai khubor.
Kane ka jingjia ka la pynmih ruh ïa ka jingïakynad ha ka saiñ pyrthei. U President ba mynta jong ka BRS u K.T. Rama Rao (KTR) u la ther tyngeh ïa ka sorkar jylla ba la ïalam da ka Congress, da kaba buh jingkylli ïa ka jingtreikam jong ki lad pynjari aiñ jong ka kiba la pynpaw pyrthei bha, kynthup ïa ka EAGLE (Elite Action Group for Drug Law Enforcement).
U KTR u la kylli kumno kum kane ka jingtreikam be-aiñ ka lah ban treikam khlem da lap wat hapdeng ki jingkynnoh kiba jrong shaphang ka jingkhanglad ïa ka jingkhaïi drok.
“Ki tnad wad bniah, ka EAGLE, bad ki pulit ki leh aïu haba kum kine ki kam runar ki pynlong beit hapoh khmut jong ki?” u la kylli.
Ki pulit jong ka Mira Bhayander Vasai Virar (MBVV) ha Maharashtra ki la kem ïa katei ka kynhun ha ka sngi Saitjaiñ hadien ka jingtohkit kaba la neh shibnai, ha kaba ki la ïoh ban kurup ïa u drok Mephedrone bad ki tiar pyndonkam bym pat saiñ kiba shongdor da ki klur tyngka, bad ki la ïoh ban kem ïa 12 ngut ki briew, kynthup ïa kawei ka kynthei na Bangladesh, ong u heh ophisar ha Thane.
Ki pulit jong ka MBVV ki la ïathuh ba ka jingtohkit ka dang ïaid shakhmat ban lap ïa ka jingpynpoi drok baroh kawei kaba ïadei bad ka kynhun pynpoi drok beaiñ.
