New Delhi, Nailur:
Ki la don palat 400 ngut ki stad saïan kiba la trei baroh shisngi ban ai jingkyrshan da kaba pyndonkam ïa ki Satellite ban peit bniah ïa ka pyrthei bad ïakren ha ka por ba leh ïa ka Operation Sindoor, ong u Chairperson ka ISRO u V Narayanan ha ka sngi Ba-ar.
Ka kynhun ba dei khmih ïa ka haw haw ka la ai jingtip na ki Satellite na ki liengsuiñ haw haw jong ka na ka bynta ki jingdonkam jong ka jingïada ri, ong u Narayanan ha ka jingkren jong u ha ka National Management Convention kaba 52 jong ka All India Management Association (AIMA).
“Ha ka por jong ka Operation Sindoor, baroh ki Satellite ki treikam bha baroh 24 kynta, kaba pynlah ïa baroh ki jingdonkam,” u la ong.
“Palat 400 ngut ki stad saïan ki la trei 24 kynta, pura bad baroh ki Satellite ba la pyndonkam na ka bynta ban peit bad pyntip ïa ka pyrthei ki la treikam bha ha ka por jong ka jingpyntreikam,” la bynrap shuh shuh u heh ka ISRO. Ka bynta jong ka tnad ba dei khmih ïa ka haw haw ha ki jingpyndonkam ïa ki tiar ka la paw bha ha ka por jong ka Operation Sindoor, kaba la ïohi ïa ka jingpyndonkam kaba jur ïa ki drone bad ki tiar siat kiba ïaid tawiar bad la tynjuh ïa ka jinglah jong ki kor ïada haw haw kum ka Akash Teer ba la shna da ki trai ri trai muluk.
Katkum ka jingong u Narayanan, ka ISRO ka la pyndep haduh 7,700 tylli ki jingpyrshang ha madan hapoh ka projek Gaganyaan kaba thmu ban pynurlong ïa ka jingher haw haw jong u briew kaba nyngkong jong ka India ha u snem 2027. Nalor kane, la thmu ban leh sa 2,300 tylli ki jingpyrshang hapoh kane ka projek shwa ban pynlong ïa ka jingleit jong u briew sha haw haw.
Hapoh kane ka projek Gaganyaan, ka ISRO ka thmu ban pynlong lai tylli ki mission khlem don briew, kaba nyngkong la khmih lynti ha u bnai Nohprah mynta u snem. Hadien kane yn sa bud sa ar tylli ki mishon khlem briew.
Ka tnad haw haw ka la ïoh ïa ki jingmynjur ban pynlong ïa ar tylli ki Mission ba don ki nongtrei hapoh ka projek Gaganyaan. U Narendra Modi, Myntri Rangbahduh, u la bthah ïa ka ISRO, ba kan thaw ïa la ka jong ka Space Station jong ka India, ha u snem 2035 bad ban pynhiar ïa u nongleit haw haw na India ha u snem 2040.
