Bengaluru, Nailur:
U Myntri Rangbah ka jylla u Siddaramaiah u la ther ïa ki nongïalam ka BJP ka Karnataka kiba pynthut ïa ka shongsuk shongsaiñ jong ka jylla. Ïa kane u la kren ha ki nongthoh khubor hangne ha ka sngi Ba-ar. Haba kylli shaphang ka jingleit jong ki nongïalam ka BJP sha Maddur, u Myntri Rangbah u la ong “ai ba kin leit noh”.
“Ka jingthmu jong ki nongïalam ka BJP ka long ban pynthut ïa ka jingïatylli. Ha Mysuru, ki la thmu ban pynlong ïa ka jingïalang Chamundi Betta Chalo.
Ki shipai RSS ki la wan na kylleng ki jaka jong ka Jylla, kynthup na Shivamogga, Chamarajanagar, Chikkamagaluru, Kodagu, Mandya bad kiwei kiwei ki jaka.
Ki wan ban pynthut ïa ka suk ka saiñ. Dei na kane ka daw ba ki pulit jong ngi kim shah ïa ki ban leit sha Chamundi betta,” u la ong.
U Myntri Rangbah u la ong ba ka BJP ka la khot pakhang shnong ha Maddur, hynrei wat shuwa ba kin dawa ne pynbor, la kem 21 ngut kiba shah kynnoh.
“Ngi shimkhia katkum ka aiñ. Ai ba kine ki riew sniew kin dei na ka BJP ne Congress, Hindu ne Muslim ne Khristan, ngi shimkhia khlem da ïohi ïa ka jaitbynriew ne ka niam jong ki”, u la ong.
Haba kylli shaphang ka kynhun jong ka BJP ba la ïalam da u President ka Jylla u BY Vijayendra bad u nongïalam ka liang pyrshah u R Ashoka kiba la ïakynduh ïa u Myntri ka tnat ki kam pohïing jong ka sorkar pdeng u Amit Shah ha New Delhi ha ka Lah sngi U Blei ban ujor halor ka suk ka saiñ ha Karnataka, u Myntri Rangbah u la ong ba ka aiñ ka suk ka saiñ ka wan hapoh ka sorkar Jylla.
“Shano kine ki nongïalam ha ka por ba ki nongrep ki ïakhih ha New Delhi bad ka jingïakhih ha Manipur”, u la kylli.
