Lucknow, Nailur:
U Myntri Rangbah ka Uttar Pradesh, u Yogi Adityanath, u thmu ïa ka “Viksit UP” ha u snem 2047, kaba pynksan ïa ka jingpule kaba kham shajrong na ka bynta ki samla nongkyndong bad ban pynbha ïa ki jingtei ha nongkyndong.
Ka jylla ka thmu ban long ka ïoh ka kot kaba $6 trillion, kaba ïarap shibun ïa ka roi ka par jong ka India. Shuwa u snem 2017, ka Uttar Pradesh ka la mad ïa ki jingeh ha ka pule puthi kaba kham shalor bad ka roi ka par nongkyndong, ha kaba ki jaka pule kiba duna bad ki jingtei kiba biang.
Ha kine ki 8 snem ba la dep, ka sorkar u Yogi ka la kiew bha ha baroh ar ki bynta. Ka jingthmu “kawei ka bynta, kawei ka skulbah” ka la pynlong ban seng ïa ki 24 tylli ki skulbah jong ka sorkar jylla bad 49 tylli ki skulbah shimet. Ka jinghikai ha ka liang ka jingstad ka la nang kiew da ki 3,310 tylli ki ITI bad 2,138 tylli ki jaka pule. Palat 150 tylli ki ITI jong ka sorkar la pynthymmai da ka jingïatreilang bad ka Tata Technologies.
Ki jingtei ha ki nongkyndong ha Uttar Pradesh ki la ïohi ïa ki jingkylla kiba khraw, kaba la ktah ïa ka jingim jong ki Million ngut.
La ai jaka sah ba neh sha ki 56.90 lak tylli ki longïing lyngba ki skhim bapher bapher. Ka jingpynïasoh ka la kham bha da ki surok ar lynti kiba pynïasoh ïa ki 165 tylli ki Block Headquarter bad ka jingshna ïa ki surok thymmai kiba jrong 1,385 km. Nalor kata, la pynheh bad pynkhlaiñ ïa ki surok kiba la don lypa ha ka jingjngai kaba 25,000 km.
Ka sorkar ka la pynleit jingmut ruh ha kaba ïadei bad ka um da kaba thaw ïa ki Amrit Sarovars bad pynïasoh ïa ki 550 tylli ki Gram Panchayat sha ka Atal Bhujal Yojana.
Ïa ki jaka treikam jong ka Panchayati Raj la pynkup bor da ki Panchayat Bhawan bad ki Sekretariat bathymmai haman la ki Gram Panchayat, ryngkat bad ka jingthung ïa ki Sahayak jong ka Panchayat.
Ban pynïadei ïa ki samla bad ka juk Digital, la sam haduh 49.86 lak tylli ki Tablet bad ki Smartphone. Palat 95 tylli ki jaka pule ki la ïoh ïa ka jingithuh jong ka NAAC, katba 67 tylli ki don ha ka kyrdan jong ka ri.
Kine ki jingpyrshang ki thmu ban pynïasoh ïa ki samla bad ki kor ki bor kiba mynta bad ban kyntiew ïa ka kyrdan pule ha kylleng ka jylla.
Ka jingthmu na ka bynta ka Uttar Pradesh ka kynthup ban pynlong ïa ki shnong ban tbit ha ka jingpynmih, ka jingmih, bad ka jingshalan shabar ri haduh u snem 2030 lyngba ki jaka buh symbai, ki jait jingthung kiba la nang la stad, ka jingpynkylla ïa ki jingthung, bad ki rukom pynkhreh marbam kiba khlaiñ.
Ha u snem 2047, ka thong ka long ban ïoh ïa ka kyrdan pyrthei ha ka jingpynmih ïa ki jingbam u khaw, ki symbai, ki soh, bad ki jhur katba ka dang long ka nongïalam ha ka pyrthei ha ka jingpynmih ïa ki jingbam na ka dud bad ka pylleng.
Ka Uttar Pradesh ka angnud ban long ka jylla kaba roi bapar da $6 trillion ha u snem 2047, kaba long 20% na ka GDP ba la thmu jong ka India.
Kane ka donkam ban pynneh ïa ka jingkiew kaba 16% naduh u snem 2025 ter ter.
Ka bor trei kaba tbit kan pynïaid ïa ki karkhana hapoh ka ri bad ha ka pyrthei.
Ka jingpynbha ïa ki jingtei ha nongkyndong bad ka jingmih ha ka rep kan kyntiew ïa ka ïoh ka kot.
Ka jingangnud jong ka jylla ka kynthup ban seng ïa ki jaka wad bniah ha ka rep ka riang kiba mynta bad ki jaka wad bniah ïa ki jingri jingdup ha ka pyrthei ban kyrshan ïa kane ka jingkylla.
Ka jingpynthikna ïa ki ïing kiba neh na ka bynta baroh ki longïing ka dei kawei pat ka jingthmu ryngkat bad ka jingpyntreikam ïa ki rukom pynkhuid jaboh kiba mynta.
Ka jingpruiddur halor ka jingthmu jong u Myntri Rangbah ka jylla ka long ban pynduh ïa ka jingbym ïahap ha ki thaiñ da kaba wanrah ïa ka Purvanchal bad Bundelkhand ha kajuh ka kyrdan bad ka Western UP.
Kane ka rukom roi kaba ïadei dur ka wad ban pynduh jait ïa ka jingduk katba ka pynthikna ïa ka jingshngaiñ ha ka imlang sahlang na ka bynta baroh.
Da kaba pynleit jingmut ha kine ki bynta ha kine ki arphew snem ban wan, ka Uttar Pradesh ka thmu ban kyntiew ïa ka jingïoh jong uwei pa uwei u briew sha ka T.26 lak ha u snem 2047.
Ki jingpyrshang jong ka jylla ki ïahap bad ka jingthmu jong u Myntri Rangbahduh ka ri u Narendra Modi halor ka ‘Viksit Bharat @2047,’ da kaba buh ïa ka ri India kum ka Engine kaba kiew.
