Amaravati, Nailur:
U Myntri Rangbah ka Andhra Pradesh, u N Chandrababu Naidu, u la ong ba ki la don haduh 200 ngut ki nong Telugu, kiba sahkut ha Nepal, kaba la shah ktah ha ki jingkulmar, bad ba la shaniah ha u Nara Lokesh, uba long u Myntri ban buddien ïa ki jingjia ha ka por ba biang.
“Ki don ki jingïakhih kiba jia ha Nepal, bad kumba 200 ngut eiei ki Telugu ki sahkut hangtei; nga la bthah ïa u Myntri HRD u Nara Lokesh ban buddien ïa ka jinglong jingman ha ka jingsynshar ha ka por ba shisha. Kane ka dei ka kamram jong ngi ban jubab bad ban ïeng ryngkat bad ki briew jong ngi ha kine ki por ba eh”, la ong u Naidu.
Ka sorkar, ka la thaw ïa ka Emergency Cell ha Andhra Bhavan ha New Delhi, na ka bynta ban ïarap ïa ki nongshong shnong kiba kren ïa ka ktien Telugu, kiba sahkut ha Nepal, kaba sakhi ïa ki jingkulmar paidbah.
U Commissioner ka Andhra Pradesh Bhavan u Arja Srikanth u la ong ba u Chandrababu Naidu u la kyrpad ïa u Myntri ka tnad Civil Aviation jong ka sorkar pdeng u Kinjarapu u Rammohan Naidu bad ki ophisar jong ka Andhra Bhavan ban ai ka jingkyrshan kaba lah ban ai.
“Halor ka jingkynrum kynram kaba dang ïai bteng ha Nepal, ka Sorkar Andhra Pradesh ka la thaw ïa ka Emergency Cell ha Bhavan, New Delhi, na ka bynta ban ai jingkyrshan mardor bad ban pynthikna ïa ka jingshngaiñ jong ki nongshong shnong Telugu kiba sahkut mynta ha Nepal,” ong u Srikanth ha ka jingpynbna pathai khubor ba la pynmih ha ka por janmiet jong ka sngi Ba-ar.
Katkum ka jingong u Srikanth, ka Embassy jong ka India ha Kathmandu ha Nepal, ka la pynthikna ïa ka jingïatreilang kaba pura, bad kumba 30 ngut ki nong Telugu ha Bafal, Kathmandu, ki dang shah ïarap mynta ha ka liang ka bam, ka jaka sah, bad ka jingïarap ha ka liang ka jingsumar.
U Commissioner u la ïathuh ba la thung kyrkieh ïa uwei u heh kum u ophisar ha Bhavan.
U la kdew ba ka sorkar ba la ïalam da ka TDP ka don ka jingïakynduh man ka por bad ka tnad kam bar ri bad ka Indian Embassy ha Kathmandu ban buddien ïa ka jinglong jingman bad ban ïada ïa ki briew Telugu.
Khyndiat tylli ki longïing Telugu kiba sah ha kawei ka Hotel ha Kathmandu la pynkynriah noh sha kawei ka ïing basa kaba don hajan hadien ba la ïoh jingtip ba ki nongïakhih ki la ïalum lang shabar bad byrngem ban thang, u la bynrap.
Ka Emergency Cell ka treikam baroh shisngi, da kaba ïatreilang bad ka embassy bad ki nongmihkhmat na ka thaiñ ban pynthikna ïa ka jingshngaiñ bad jingbha jong ki briew Telugu ha Nepal, la bynrap shuh shuh ka jingpynbna.
