Hyderabad, Nailur:
U Myntri ka tnad Housing u Ponguleti Srinivasa Reddy ha ka sngi Palei u la plie paidbah ïa ka jaka phone khlem jingsiew kaba la buh ha Housing Board Corporation ha Hyderabad ban pdiang ïa ki jingujor bad jingeh jong ki nongïoh jingmyntoi na ka Indiramma Housing Scheme bad ban pynbeit ïa ki jingeh. U Toll Free number u dei u 1800 5995991. Kane ka Centre kan treikam man ka sngi naduh ka por 7 baje mynstep haduh ka por 9 baje mynmiet.
Haba kren ha kane ka sngi, u Myntri u la ong ba ki ophisar kin pynbeit ïa ki jingeh katkum ka phone number jong ki nongïoh jingmyntoi bad u Aadhaar number. “Ki jingujor kum ka jingpynslem ban siew bill bad ha kaba buh dur, ki jingeh ha ka liang ka jingstad bad ki jingkynnoh bamsap yn sa pdiang beit na ki paidbah bad yn phah sha ki bor ba dei peit ban leh eiei bad ïa ka jinglong jong kine ki mat ruh yn sa pyntip sha ki nongïoh jingmyntoi,” u la bynrap.
U Myntri u la ban jur ba la buh jingmut bha ïa ka jinglong kaba shai ha ka skhim shna ïing jong ka Indiramma bad la pyndonkam ruh ïa ki kor ki bor kiba thymmai. U la bynrap ruh ba ka Indiramma Housing app ka la dep pyni ïa ka jingbha bad ïa ka Artificial Intelligence (AI) la pyndonkam bha ruh kumjuh. U la kdew ba la sdang ïa ki sienjam ban pynthikna ba kan ym don ka jaka na ka bynta ka jingbamsap.
Hadien ba la plie ïa kane ka Call Centre, u Myntri u la ïashim bynta dalade ha ka Phone Call ba la leh da uwei u nongïoh jingmyntoi na Wanaparthy distrik.
