Puducherry, Nailur:
U Myntri Rangbah barim bad u nongïalam ba rangbah jong ka seng Congress, u V Narayanasamy, ha ka sngi Palei u la thombor jur ïa ka sorkar AINRC-BJP ha Puducherry, da kaba kylli hato ka sorkar kaba “ym lah wat ban pynbiang wat ïa ka um dih kaba khuid” ka long kaba donkam shisha.
Haba ïakren bad ki nongthoh khubor, u Narayanasamy u la kynnoh ba ka um dih kaba jakhlia ka la kylla long ka jingeh kaba khraw ha ka koit ka khiah ha Puducherry, ha kaba lai ngut la pynshisha ba ki la ïap bad bun ki nongshong shnong ki la kem pang bad shah sumar ha ki jaka sumar.
“Ka sorkar ka kyntait ban kren ïa ka jingshisha, ki briew kin ym map ïa u Myntri ka tnad PWD u K Lakshminarayanan bad ïa u Myntri Rangbah barim u N Rangasamy. U Myntri u dei ban shim ïa ka jingkitkhlieh kaba don burom bad ban hiar shuki noh”, u la ong.
Da kaba pynpaw ba ka jinglong ka um ka long kaba sngewsih ha UT, u la ong ba ym shym la don kano kano ka jingpyrshang ban buh ïa ka jaka pynkhuid um lane ban pyntreikam ïa ka skhim AFD (Agence Francaise De Development).
Une u nongïalam ka Congress u la kynthoh ruh ïa ka sorkar ba kam shym la lah ban sam khaw khlem jingsiew ha kine ki ar bnai ba la dep.
Da kaba kynnoh ba don ki jingleh bym hok, u la kynnoh ba ïa u khaw uba die ha ka dor 32 tyngka shi kilo ha ïew la thied ha ka dor T.47 shi kilo bad sam.
U Lat ka jylla dang shen u la pynsangeh noh ïa katei ka skhim namar ka jingkynnoh ba don ka jingbamsap ha ka jingpynkhreh ïa ka tender bad u dang pynlong ïa ka jingtohkit, u la kdew. “U Myntri Rangbah u dei ban pynshai ïa kane sha ki paidbah”, u la dawa.Halor ka kam sorkar, u Narayanasamy u la tuklar ïa ka jingkam jong u Myntri Rangbah u Rangasamy ban pyndap ïa ki 4,500 tylli ki kam ba lait.
“Ha ki saw snem shiteng, la pyndap tang 1,500 tylli ki kam, lada la thung kam 4,500 ngut, ai ba un pynshisha, lym kumta, u dei ban iehnohkam, lada pynshisha ba nga bakla, ngan iehnoh ïa ka kam saiñ pyrthei”, u la pynbna.U la ong shuh shuh ba ka Congress kan pynlong ïa ki jingïakhih ban pyrshah ïa ka jingpynlong shimet ïa ka tnad bording jong ka UT kynthup ïa ka jingleh niam, bud sa ka jingkhang dam.
U Narayanasamy u la kynthoh ruh ïa ka Puducherry BJP unit, da kaba kynnoh ba ki dkhot jong ka seng kiba la slem bha ki shah kyntait namar ba ki nongïalam barim jong ka Congress kiba phet sha ka BJP ki shimti ïa ki kyrdan ba kongsan.
