Mysuru, Nailur:
U nongaiktien ka BJP ha ka Jylla, u MG Mahesh, u la ther tyngeh ïa u President jong ka AICC, u Mallikarjuna Kharge, halor ka jingkren jong u, ba arngut ki nongïalam jong ka Gujarati, u Mahatma Gandhi bad u Sardar Vallabhbhai Patel, ki la pynjop ïa ka India ïa ka jinglaitluid jong ka, katba arngut kiwei pat, u Myntri Rangbahduh u Narendra Modi bad u Amit Shah, Myntri ka tnat ki kam pohïing, mynta ki ïa phiah ïa ka.
U Mahesh u la ong “u Kharge u la kynnoh ïa u Modi bad u Shah ba ki pynpait ïa ka jaitbynriew.Hynrei dei ka Congress kaba la pynpait ïa ka ri India bad pynthikna ba u Jawaharlal Nehru u long u Myntri Rangbahduh.
Hadien jong u, ka khun jong u, ka Indira Gandhi bad u khun ksiew jong u, u Rajiv Gandhi, ki la bat ïa katei ka kam, bad mynta u khun ksiew jong u, u Rahul Gandhi, u peit ïa katei ka kam.
U Kharge, uba ïaineh matlah ïa ka longïing Gandhi, mynta u thmu ïa u Myntri Rangbahduh, bad da kaba leh ïa kane, u la pynjah burom ïa ka Gujarat hi, ïa kaba ka BJP ka pynrem jur.”
Shuh shuh u Mahesh u la bynrap ba ki paidbah ka Kalyana Karnataka ki la kyntait ïa u Kharge ha ka ilekshon, namar ka jingbymlah jong u ban kyntiew ïa katei ka thaiñ.
“Ha ki ar snem ba ladep, kumba 1,700 ngut ki kynthei ki la shah batbor, palat 5,000 ngut ki khynnah kynthei ki la jah rngai, ka kyrdan SSLC bad PUC ka la hiar sha ka kyrdan kaba 34, bad ka jingduna bam ka dang long kaba heh tam ha Kalyana Karnataka.Ki distrik hangta kim shym la ïohi ïa ka jingroi kaba shisha. Ha ka jaka ban kynthoh ïa u Modi bad u Shah, u Kharge u dei ban pynleit jingmut ha kaba pynbha ïa ka thaiñ kaba u mihkhmat,” u la pynkut.
