New Delhi, Nailur:
U Myntri kam bar ri ka India, u S.Jaishankar, u la ong ba ka pyrthei baroh kawei ha kine ki sngi, ka pyrshang ban pynbit pynbiang ïa ka ïoh- ka kot jong ki bad ban pyntikna ïa ka khaïi- pateng na ka bynta ka jingmyntoi jong baroh. Kane ka jingkren jong u Jaishankar ka long halor ïa ka jingjur ka jingsngewkhia ha ka pyrthei halor ki khajna jong ka United States ha kine ki sngi.
Ha ka jingkren jong u ha ka jingïalang jong ka kynhun BRICS ba la long ha ka taïew ba la dep, une u Myntri kam bar ri u la ong ba ka India ka ngeit skhem ba ki nongrim ba kongsan jong ka rukom khaïi- pateng ha ka pyrthei ki dei ban ïoh ka jingïada bad ba ka donkam ban thaw ïa ki lad pynpoi marbam ba kham suk bad kaba lah ban pyntikna.
U S.Jaishankar u la leit ban mih khmat na ka bynta u Myntri Rangbahduh ka India- u Narendra Modi, ha katei ka jingïalang kaba la ïashim bynta da u President ka China- u Xi Jinping, u President ka Russia- u Vladimir Putin bad katto katne ngut kiwei pat ki nongïalam jong katei ka kynhun BRICS.
ïa katei ka jingïalang, la khot bad pynbeit da u President ka Brazil, u Luiz Inacio Lula da Silva, ban ïakren halor ki jingthut ha ka khaïi- pateng, kiba la pynmih da ki polisi jongka US, halor ka khaïi- pateng bad ka khajna.
Namar la ong ba ka US ka la buh khajna ruh 50% ïa ki mar khaïi ba shalan shabar jong ka Brazil kumba ka la leh ïa ka ri India bad dei kane ka jingeh, kaba la pynsngewkhia ïa kitei ki ri kiba don ha katei ka kynhun BRICS bad kaba la pynlong ïa ki ban ïalum lang bad ban ïa pyrkhat thymmai kumno ban leh, ban tehlakam ïa ki jingeh kiba wan mih na kitei ki khajna jong ka US ha kine ki sngi.
