Bengaluru, Nailur:
U DK Shivakumar, uba dei u Symbud Myntri Rangbah bad u Myntri uba dei khmih ha Bengaluru, uba angnud ban long u Myntri Rangbah ka Karnataka, u pyrshang ban pynkylla ïa ka ilekshon sha ki san tylli ki Corporation kiba hap hapoh ka Greater Bengaluru Authority (GBA), sha ka bynta ba shimet.
Da ka jingsdang jong u Nongïalam ka Liang Pyrshah ha Lok Sabha u Rahul Gandhi ïa ka jingïalap ‘vote chori’ na Bengaluru, da kaba kynnoh ïa ki jingleh bymsuidñiew ha ki ilekshon Lok Sabha, khamtam ha Mahadevapura Assembly konstitwensi, u Shivakumar u paw ba u la shim ïa ka kum ka lad ban tynjuh ïa ka jingtbit jong u ha ka ilekshon.
Kaba sngewtynnad ka long ba u dkhot jong ka AICC, u Sunil Kanugolu, uba la trei kum u nongpynïaid lynti na ka bynta ka jingjop kaba khraw jong ka seng ha ka ilekshon sha ïingdorbar ha u snem 2023, un long u nongpynïaid na ka bynta ki Myntri ha Bengaluru. Ka kynhun jong u Kanugolu, kaba la don ha ka kam ha Kerala, na ka bynta ka jingthep vote, kan sa hiar shen ha ka GBA, ong ki tyllong khubor.
Ha ka sienjam kaba la ïaid shakhmat, la thung ïa ki MLC kiba don katto katne ka jingbat ïa ki konstitwensi ha ki 10 tylli ki Assembly konstitwensi, ban ïatreilang bad ki Myntri kiba kynthup ïa u Srinivas (KR Puram), Ramoji Gouda (Bommanahalli), Govindaraj (Dasarahalli), Nazir Ahmed (Chickpet), MR Seetharam(Yelahanka), Sudham Das (CV Raman Nagar), Ramesh Babu (Malleswaram), UB Venkatesh (Basavanagudi), Saleem Ahmed (Mahalakshmi Layout) bad u Nagaraj Yadav (Mahadevapura) bad u Deputy Mayor barim u L Srinivas (Padmanabha Nagar).
Hadien ka jingïakren bad u General Secretary ka AICC ba dei peit ïa ka Karnataka, u Shivakumar u la pynkhreh na ka bynta ka jingtreikam ki seng.
U la thaw ïa ka komiti ryngkat bad u briew ba shaniah jong u bad u president ba trei jong ka KPCC u GC Chandrashekar bad u dkhot ka RS kum u nongpynïaid, ban peit ïa ki jingpynkhreh bad ki kam pynbeit na ka bynta ki ilekshon ban wan sha ki san tylli ki Corporation.
Uwei pat u dkhot ba shaniah jong u, u heh barim jong ka IYC, u BV Srinivas, u dei u nongpynïaid lang.
Ki nongïalam jong ka seng ha Bengaluru, kiba kynthup ïa ki MLA, ki kyrtong kiba la shah rem ha ka ilekshon Lok Sabha 2024 bad ha ka ilekshon sha ïingdorbar thawaiñ jong u snem 2023, baroh ki President jong ka District Congress Committee bad ki nongkitkam jong katei ka seng, kynthup ïa ki Secretary jong ka AICC, ki la shah thung dkhot ha katei ka komiti. U Kanugolu ruh u don lang ha kane ka komiti.
U Shivakumar u la mihkhmat ïa ka aiñ synshar jong ka Bengaluru kaba heh 2024, bad u la ïoh ïa ka BBMP ban phiah ha ki san tylli ki Corporation.
Hapoh ka Section 35 jong ka aiñ, ka don ka kyndon ban leit thep vote da kaba pyndonkam ïa ki kot thep vote ha ka jaka jong ki EVM.
Ka ïingbishar ba hakhliehduh ka la ai jingbthah ban pyndep ïa ka jingpynbeit pud ïa ki ward hapoh ka 1 tarik u Naiwieng, bad ban pynbeit ïa ka jaka sah hapoh ka 30 tarik u Naiwieng, kaba mut ba ki jingthep vote na ka bynta ka GBA ki la jan.
