Ranchi, Nailur:
Sa ha kawei pat ka jingïakhun kaba la wanrah jingjop ha ka sngi kaba ar, ki la don lai ngut ki Maoist, ba kynthup ïa u Shahdeo Soren uba la shah thong halor ka khlieh jong u da ka khusnam kaba T.1 klur, ki la shah pynïap noh ha ka jingïasiat bad ki pulit ha Jharkhand. Katei ka jingjia, ka la jia ha ka por mynstep ha ki khlaw Pantitary kiba hap hapoh Girhor Police Station ha Hazaribagh.
U Sahdev Soren ba la tip ruh da ka kyrteng kum u Parvesh, u dei u dkhot jong ka komiti pdeng jong ka CPI (Maoist). Katkum ka khubor na ki pulit la ong ba ki la thwet ïa u la slem bha. Ka kynhun ba ïatreilang jong ka Cobra 209 bad ki pulit ka Hazaribagh ki la ïashim bynta ha kane ka jingïakynduh, ki la ïathuh.
“U Sahdeo Soren, u dkhot ka Central Committee jong ka CPI (Maoist) uba la shah thong ha ka khlieh jong u da T.1 Klur bad arngut kiwei pat ki Maoist ki la ïap ha ka jingïasiat bad ka kynhun ïatreilang jong ki pulit CoBRA battalion, bad ki pulit jong ka Giridih bad Hazaribagh mynta ka step ha ka jingkhynra kaba dang pynlong katkum ka jingïoh lum ïa ka khubor bathikna. ” la ong ka jingthoh jong ki pulit ka Jharkhand. Ïa ka metïap jong u Sahdev Soren bad arngut kiwei pat ki Maoist la lap na ka jaka ba la don ka jingïasiat, la bynrap ka jingthoh. U Maoist uba ar uba la shah pynïap ha katei ka jingïasiat u dei uba la tip kyrteng kum u Raghunath Hembrom, uba dei u dkhot jong ka Bihar-Jharkhand Special Area Committee (SAC), ha kaba la thong da T.25 lak ha ka khlieh jong u. U lehnoh uba lai uba la shah pynïap ha ka jingïakhun u dei u Birsen Ganjhu ba la ju khot sin da ka kyrteng kum u Ramkhelawan, uba dei u dkhot jong ka Regional Committee jong ka CPI (Maoist) bad u la shah thong ruh ha ka khlieh jong u da T. 10 lak.
Ka tyllong khubor na ki pulit ka la pyntip ba kitei baroh lai ngut ki Maoist ki dei kiba trei beit ha ki thaiñ khappud jong ka Jharkhand bad Bihar naduh ki por kiba la slem bha bad ki la don bynta ban pynlong ïa ki katto katne ki kam lehnoh Maoist kiba jur ha kane ka thaiñ.
Ki bor pahara ki la ïoh kurup ruh ïa ki tiar ïaleh kiba lah ban pynïap briew, kynthup ïa ki AK-47, na katei ka jaka. Ka SP ka Hazaribagh ka Anjani Anjan ka la pynthikna ïa kane ka jingjia bad ka la ong ba ka la khot ïa kane ka jingjop kaba khraw na ka bynta ki bor pahara.
Katkum ka jingong u SP, la buddien bha ïa ki kam jong kine ki Maoist, kaba la ïalam sha ka jingjop kaba khraw mynta ka step. Ka jingkhynra ka la nang jur ha baroh kawei ka thaiñ hadien ka jingïasiat ban lap ïa ki Maoist kiba la lait ban phet krad na katei ka jaka da kaba shim kabu na ka jingdon jong ki khlaw kiba rben.
La ngeit ba ki don ruh kiwei pat ki Maoist kiba la mynsaw ha katei ka jingïasiat kaba markylliang. Ïa kane ka kam la shim ba ka dei ka jingjop kaba khraw jong ki pulit jong ka Jharkhand bad ki bor pahara jong ka sorkar pdeng.
Ha ka step jong ka sngi U Blei, ki pulit ka Jharkhand ki la siat ruh ïa u Mukhdeo Yadav uba la shah thwet ha ki pulit uba dei u dkhot jong kawei ka kynhun ki Maoist ba la shah ñiew beaiñ, ka Tritiya Sammelan Prastuti Committee (TSPC) ha ka jingïasiat. Kane ka jingïasiat kaba jur, kaba la jia hapdeng ki bor pahara bad ki dkhot ka TSPC ha ki khlaw Manatu jong ka Palamu, ka la neh katto katne kynta.
Kaba kham kongsan ha kane ka bynta, ka long ba namar ba ka jingleh jong ki pulit pyrshah ïa ki Maoist bad ki riew sniew ba la pynbeit ryntih ka la nang jur ha Jharkhand, ha ka jingkheiñ kyllum lai tylli ki jingïasiat ki la don man la u bnai ha kine ki 8 bnai ba la dep ha ka jylla. Ki don haduh 30 ngut ki Maoist bad lai ngut ki nongleh kam sniew kiba kham runar, kiba la shah pynïap ha ki jingïasiat bad ki bor pahara ha ki distrik bapher bapher jong ka Jharkhand. Ha kaba ïadei bad kane, ki la don ruh san ngut ki shipai paraha kiba la shah pynïap ha ka jingïasiat bad ki lehnoh.
