Chennai, Nailur:
Arngut ki dkhot jong ka Dhandapani Swami Mutt bad uwei u nongkitkam ka BJP, ki la long napdeng ki hynñiew ngut, kiba la shah kem ha ka sngi Saitjain, namar ba ki la byrngem ïa ki heh jong ka HR&CE ha ka nongbah Palani.
La kynnoh ruh ba ki la pyrshang ban khanglad ïa ki jingpyntreikam bathymmai ba la don ha ka jaka jong ka kynhun niam. Ki tyllong khubor ki ïathuh ba katei ka Mutt – kaba treikam ha ki kjat lum Palani la palat 200 snem – ka don ïa ka jaka kaba lait bad ka jaka shongthait na ka bynta ki riewngeit kiba wan jngoh ïa ka Temple u blei Dhandayupani kaba don ha jrong jong u lum. Ha u snem 1999, ka tnad HR&CE ka la shimti ïa katei ka jaka hadien ba uwei na ki nongkhmih u la pyrshang ban die noh ïa ka, bad thung ïa uwei u Thakkar ban pynïaid ïa ka.
Ki nongpynïaid ki la mudui ha ka Madras HC, bad ha ka por ba la buh, la weng noh ïa baroh ki mukotduma. Ha ka 13 tarik u Nailur, ki heh jong ka HR&CE ki la rai ban pyndonkam ïa kane ka jaka kaba heh 1.4 akar na ka bynta ban pynïeng ïa ki kali ilektrik kiba pyndonkam ban kit ïa ki riewngeit.
Hynrei ki Trustee kiba kynthup ïa u Shanmuga Sundaram, u Murugadas Adigalar, ha ryngkat u President ka BJP Palani Division u T Ananda Kumar, bad katto katne ngut kiwei pat, ki la poi ha katei ka jaka, la kynnoh ba ki la byrngem ïa ki heh sorkar bad ki la pyrshang ruh ban khanglad ïa katei ka kam. Da kaba pynshong nongrim halor ka jingujor jong u Joint Commissioner Marimuthu, ki pulit jong ka Palani Adivaram ki la ujor mukotduma pyrshah ïa ki nongkitkam, u dkhot ka BJP bad saw ngut kiwei pat.
