Vijayawada, Nailur:
U Chief Justice jong ka High Court ha Andhra Pradesh u Dhiraj Singh Thakur u la ban jur ïa ka jingdonkam ban thaw ïa ka jingtip aiñ ha ki samla pule.
U la ïashim bynta ha ka jingïamir jingmut jong ki nongïashim bynta ba man la u snem ha ka kyrdan jong ka jylla-2025 halor ka phang ‘Safeguarding the Girl Child: Towards a Safer and Enabling Environment for her in India’ ha Tummalapalli Kalakshetram ha Vijayawada ha ka sngi U Blei.
U la pynpaw ïa ka jingdonkam ban thaw ïa ka jaka kaba shngaiñ bad kaba kyrshan ïa ki khynnah kynthei, da kaba pynksan ïa baroh ar ka jingpyntreikam ïa ka aiñ bad ka jingpynsngewthuh ïa ka imlang-sahlang kum u shabi jong ka.
U la kdew ba ka jingpynsngewthuh ïa ki samla pule bad ïa ka imlang-sahlang shaphang ki jingma kiba lah ban mih na ka jingshah lehbeiñ ka lah ban don ka bynta kaba khraw ha kaba tehlakam ïa ki jingjia jong ka jingleh be-ijot.
U la pynpaw ba ki lad jingïada lyngba ka jinghikai bad jingpynsngewthuh kan ïarap ban tei ïa ki jaka kiba kham shngaiñ na ka bynta ki khynnah skul, khamtam eh ïa ki khynnah kynthei.
“Ka jingïada ïa ka khynnah kynthei kam dei ka kam lehbha. Ka dei ka jingbei tyngka ha ka jingkiew bad ka burom jong ka imlang-sahlang bad ka jaitbynriew jong ngi. Kaba sngewkhia ka long ba bunsien ki nongleh kam bymman ïa kiba long ki lanot, ki dei ki bahaïing, ki nongtrei ïing ne kiba ithuh ne paralok , ha kaba kane ka pynlong ïa ki kmie ki kpa ba kin peit thuh bad kane ka long kaba donkam bha,” u la ong, da kaba kyntu ïa ka tnad pule-puthi ban pynsngewthuh ïa ka POCSO Act, khamtam na ka bynta ki khynnah shynrang klas 9 bad 10, ban ïada na ki jingbakla jong ki samla kiba lah ban wanrah ïa ka jingma ha ka jingim.
Ka Justice Revati Mohite Dere jong ka Bombay High Court ka la ban jur ba ka Riti Synshar ka ai jingkular ïa uwei pa uwei u khynnah ïa ka hok ban im, ban ïoh ïa ka burom, ban ïoh ïa ka jingïaryngkat, bad ban ïada na ka jingshah lehbeiñ.
Ka la batai ïa ki buit ban ïada ïa ki khynnah kynthei, kynthup ïa ka jingpyntreikam kaba paka ïa ki aiñ kum ka POCSO Act bad ka Prohibition of Child Marriage Act,ban pynkup bor ïa ki khynnah kynthei lyngba ka jingpule bad ki lad nongïalam, bad ban pynrung ïa ki paidbah ha kaba ïaleh pyrshah ïa ka jingsngewpher jaitbynriew.
U Justice Ravi Nath Tilhari uba dei u Chairperson jong ka Juvenile Justice Committee u la pynpaw ba ka jingïada ïa ki khynnah kynthei ka dei ka kamram ba la buh lang ha ka Riti Synshar ka ri, kam dei tang ka kamram jong ki longïing ne ka jylla. Katba ki aiñ bad ki polisi ki dang don, u la ong ba bun ki khynnah kynthei ki dang ïakynduh ïa ka jingshah kyntait ha ka jingshngaiñ, ka koit ka khiah, bad ki lad ki lynti.
“Ka khynnah kynthei kaba shngaiñ bad kaba la nang la stad ka san sha ka kynthei kaba khlaiñ kaba pynkylla ïa ki longiing longsem, ki shnong ki thaw, bad ka jaitbynriew. Ka jingbymlah ïa ka ka long ka jingbymlah ïa ka jingkular jong ka hok bad ka jingïaryngkat,” u la peit bniah.
Ka Justice V Sujatha ka la batai ïa ki khynnah kynthei kum ki nongthaw bad ki nongpynmih jingmut, da kaba ban jur ba ka jingpynkupbor ïa ki ka sdang na la ïing.
“Ka pyrthei khlem ki khynnah kynthei ka long kum ka pyrthei khlem um,” ka la kynthoh, da kaba kyntu ïa ki kmie ki kpa ban hikai ïa ki khynnah shynrang ïa ka jingburom bad ka jingïaryngkat naduh dang rit.
Ka la khot ïa ka imlang-sahlang ban pynkut noh ïa ka jingshongkha khynnah, ka jingleh shiliang bad ka jingbym pynïoh jingnang jingstad.
“Ka jingïada ïa ka khynnah kynthei kam mut tang ban ïada ïa ka na ka jingma hynrei ban ailad ïa ka ban thrang bad ban ïoh ïa ki jingjop,” ka la ong.
Ki nongïashim bynta ki la pynskhem biang ïa ka jingkitkhlieh lang jong ki jaka pule, ki shnong ki thaw bad ki longïing ha kaba pynthikna ba kawei pa kawei ka khynnah kynthei kan san da ka burom.
