Patna, Nailur:
Hapdeng ka jingïakren halor ka jingbhah shuki kaba dang ïaid shakhmat hapoh ka kynhun INDIA block ka liang pyrshah na ka bynta ka ilekshon ban wan sha ka Ïingdorbar Thawaiñ jong ka Bihar, u nongïalam ka Rashtriya Janata Dal (RJD) u Tejashwi Prasad Yadav u la pynmih ïa ka rai da kaba pynbna ba ka RJD kan ïakhun ïa baroh 243 tylli ki konstitwensi.
Haba kren ha ka jingïalang paidbah ha Muzaffarpur ha ka janmiet jong ka sngi Saitjaiñ, u Tejashwi u la ong, “Ngin sa wanphai biang. Sngewthuh ïa kane, Phi baroh phi hap ban ïa long kawei, bad ha kane ka kynti, u Tejashwi un ïakhun ilekshon ha ki 243 tylli ki konstitwensi.
“Kane ka sorkar kaba la synshar mynta la 20 snem, kaba trei ban pynsaphriang ïa ka jingïathombor para jaitbynriew, ka hap ban shah weng noh”, u la ong.
Ïa kane ka jingkren jong u Tejashwi la ïohi ha ki seng saiñ pyrthei kum ka buit pynbor ha ka por ba ka jingïakren ban ïasam shuki hapoh ka kynhun INDIA ka dang sahkut. Hynrei u nongaiktien ka RJD, u Mritunjay Tiwari, u la pynrit ïa ka jingkren jong u Tejashwi, bad u la ong ba u mut ban ong ba yn ïakhun ilekshon hapoh ka jingïalam jong u (Tejashwi).
“Kumta, un ïakhun ïa baroh ki konstitwensi.” Ka jingkren jong u Tejashwi kan ym ktah ïa ka synjuk namar ki kyrtong jong ka INDIA bloc kin mih ha baroh ki 243 tylli ki konstitwensi hapoh ka jingïalam jong u Tejashwi. “Ym dei ban pule palat ïa kata”, la ong u Tiwari bad bynrap ba ka INDIA bloc ka dang sahkut.
Ka jingïakren ban ïasam ïa ki shuki ha ka kynhun INDIA ka la nang kham jynjar namar ka jinglah ban rung u Myntri Rangbah ka Jharkhand u Hemant Soren bad u Myntri barim ka sorkar pdeng u Pashupati Paras ka Rashtriya Lok Janshakti Party (RLJP).
Haba sdang ïa ka jingkynthoh kaba jur ïa ka sorkar NDA jong ka jylla, u Tejashwi ha ka jingïalang jong ki nongbud ka seng u la ong ba ki nongkhaïi ki shah rahbor bad shah pynïap man ka sngi ha ka jylla, bad ka jingbamsap ka la poi sha ka thong, ha kaba ki baduk ki shah pyndonkam bakla naduh ki thanat pulit ba marjan haduh ki jaka treikam jong ka jylla.
Ha kaba sdang jong kane ka taïew, u nongpeit ïa ka AICC jong ka Bihar u Krishna Allavaru u la ai jingmut ba ka RJD ka dei ban pyni ïa ka jinglong kaba kham jem ha ka jingïateh ban ïasam jaka.
Ki tyllong khubor ki la ïathuh ba ka Congress ka kwah ban ïakhun ha ki 70 tylli ki konstitwensi kiba ka la ïakhun ha ka ilekshon 2020, katba ka RJD ka la pynkhreh ban tyrwa ïa ka 52 tylli ki konstitwensi.
Napdeng ki seng ba la ïatreilang bad ka kynhun NDA, ka Hindustani Awam Morcha (HAM) jong u Jitan Ram Manjhi ka la pynpaw ba kan ïakhun 100 tylli ki konstitwensi lada ym tyrwa 15-20 ki konstitwensi ha kane ka ilekshon ban wan.
