Hyderabad, Nailur:
Shisngi hadien ba ki pulit jong ka EAGLE ki la lap ïa ka jaka shna drok ha Medha School ha Old Bowenpally, ki pulit ki la ïathuh ba u snar nongïalam uba la shah kynnoh donkti, u Director jong ka skul u Malela Jaya Prakash Goud, u la sdang ban pynmih ïa u drok Alprazolam ha katei ka jaka kumba 8 bnai mynshwa, hadien ba u la tip ïa ka rukom shna drok ar snem mynshwa da kaba siew T.2 lak.
Ka tyllong khubor na ka EAGLE, ka ïathuh ha ki lad phah khubor, ba u Prakash, u la pynïaid ïa kawei ka Toddy Compound, ha ka shnong trai jong u, ha ka shnong Thunikinipur, ha Mahbubnagar distrik, hapdeng u snem 2021 bad 2022, ha kaba u la die ruh ïa u Toddy ba la khleh lang. Ha katei ka por, u la ïakynduh ïa uwei u Guruva Reddy, na uba u la thied ïa ka rukom shna dawai Alprazolam ha ka dor T. 2 lak.
Hadien u la thied ïa ki tiar bad ki dawai kiba donkam na ki dukan bapher-bapher bad u la buh ïa ka Lab ha ka mala kaba ar jong ka skul.
Ha kine ki hynriew bnai ba la dep, la kynnoh ba u la pynmih ïa ka dawai Alprazolam bad u la pynbiang sha Raju Goud, Kumar Goud, Krishna Goud, Narender Goud, Praveen Kumar, Moka Bharath bad kiwei kiwei na Vikarabad bad Mahbubnagar distrik.
Ki pulit ki la buh jingmudui pyrshah ïa ki ruh kumjuh. La lap ruh katto katne ki mar rep ba la buh ha ka Cellar jong ka skul.
Ki bor pynïaid ki la weng noh ruh ïa ka jingpynrung kyrteng jong ka skul ha ka sngi U Blei. Ka DEO ka Medchal-Malkajgiri, ka Vijaya Kumari, ka ïathuh ha ka jingïakren bad ki nongthoh khubor, ka la ong, ba kane ka skul ka dei kaba la seng ha u snem 2014, ka dei kaba la pynrung kyrteng na ka bynta ka snem pule 2025-26 bad ka ai ïa ka Class 1 haduh 7, ha kaba ki don 42 ngut ki khynnah skul.
Ki heh sorkar ki la buh por ban ïakynduh ïa ki kmie ki kpa ha ka lah sngi U Blei bad rai halor ka jingpynkynriah ïa ki khynnah sha kiwei pat ki skul.
