Bengaluru, Nailur:
Ha ka jingkren ba dang shen, u Rahul Gandhi u la kynnoh ba ka “vote chori” (jingtuh nongthep vote) ka dang ïaid ha India, da kaba kdew kyrpang sha u Aland uba don ha Kalaburagi distrik.
U la kynnoh ba la pyndam noh haduh 6,018 tylli ki kyrteng jong ki nongthep vote, khamtam ha ki jaka ba ka seng Congress ka ïoh ïa ka bor ilekshon.
U Gandhi u la pynpaw ruh ïa ka jingjia jong kawei ka kynthei kaba kyrteng ka Godabai, da kaba kynnoh ba ïa ki jingtip jong ka la pyndonkam bakla ha ka jingpyrshang thok ban pyndam noh ïa ki kyrteng jong ki 12 ngut ki nongthep vote.
Halor kine ki jingkynnoh, u CEO ka Karnataka u la pynmih ïa ka jingpynbna kaba batai ïa ki jingshisha. Katkum ka jingïathuh jong u Election Returning Officer (ERO) jong ka Aland, baroh ki don haduh 6,018 tylli ki aplikeshon Form 7 ha u bnai Nohprah 2022 lyngba ki official apps kum ka NVSP, VHA, bad GARUDA.
Kine ki aplikeshon ki dei ki jingkyrpad ban pyndam noh ïa ki kyrteng nongthep vote na ki thup kyrteng jong ki nongthep vote.
Ki aplikeshon ki la ïaid lyngba ka jingpynshisha kaba bniah. Na ki 6,018 tylli kiba la ïoh, la lap ba 24 tylli ki dei kiba shisha, katba kiwei pat ki 5,994 tylli la kheiñ ba kim long kiba biang ne kiba bakla.
U CEO u la ban jur ba ïa ki aplikeshon bym biang la kyntait beit, da kaba pynthikna ba kita ki kyrteng kin sah kumjuh ha ka thup jong ki nongthep vote.
Ban weng ïa ki jingsngewkhia halor ka jingpyndonkam bakla, u ERO jong ka Aland u la ujor ejahar ha u bnai Rymphang, 2023 ha thanat pulit jong ka thaiñ.
Shuh shuh, ha ka 6 tarik u Nailar, 2023, ka ophis jong u CEO ka la phah ïa baroh ki jingtip ba ïadei bad kane ka mukotduma sha u heh pulit, Kalaburagi, ban ïarap ha ka jingtohkit.
Ka jingpynshai ka pyrshah beit ïa ka jingong jong u Rahul Gandhi ba “ka jingpyndam paidbah ïa ki nongthep vote,” ha kaba ki bor pynïaid ilekshon ki pynskhem ba ki lad jingïada ki khanglad ïa kano kano ka jingpynkylla kaba heh ïa ki thup nongthep vote.
Ka ejahar ka pynthikna ba kino-kino ki briew kiba donkti ha kaba thep ïa ki aplikeshon thok kin ïakynduh jingeh katkum ka jingtreikam jong ka aiñ.
Ka jingpynbna ka pynpaw ïa ka jingsngewkhia ha kylleng ki thup kyrteng thep vote jong ka ri India, ha kaba baroh ar ki seng saiñ pyrthei bad ki heh ba dei khmih ha ki kam ilekshon ki buddien bha ïa ki jingkyrpad ban pyndam noh ban ïada na ka jingbym ïahap shwa ka ilekshon ban wan.
