Chennai, Nailur:
U khlur ak phlim uba la kylla long u nongsynshar bad u heh ka seng Makkal Needhi Maiam (MNM) u Kamal Haasan, u la sdang ban ïasyllok bad ki nongtrei jong ka seng jong u na Tamil Nadu bad Puducherry kum shi bynta ban pynkhreh na ka bynta ka ilekshon sha ka Ïingdorbar thawaiñ jong u snem 2026.
Ki jingïakren, ki ban bteng haduh ka sngi U Blei, ki dei ki jingleh ilekshon ba nyngkong eh jong ka MNM hadien ba ka la ïateh lok pura bad ka DMK kaba bat ïa ka jingsynshar.
La sdang ha u snem 2018 kum ka bor kaba pher na ki ar tylli ki seng Dravidian kiba donbor ha ka jylla, ka MNM kam pat lah ban jop ha ka ilekshon. Ha ka ilekshon sha ka ïingdorbar thawaiñ jong u snem 2021, u Haasan u la ïakhun na Coimbatore South hynrei u la shah rem tang khyndiat ha ka Vanathi Srinivasan jong ka BJP.
Ki briew kiba don hapoh ka seng ki la ïathuh ha ki lad pathai khubor ba ka jingthmu mynta ka long ban wad ïa ki konstitwensi kiba kham khlaiñ katkum ka jingmih jong u snem 2021 bad ban trei ïa ki buit ban pynkhlaiñ ïa ka jingdon jong ka MNM ha madan shwa ka ilekshon. “Ngi dang shna map ïa ki jaka ba ka seng ka don ïa ka nongrim kaba lah ban shaniah bad ngi dang pynkhreh ban pynskhem ïa ka kyrdan jong ngi,” la ong uwei u nongbud ka seng.
Shuwa ka ilekshon Lok Sabha ha u snem 2024, u Haasan, u la pynbna ïa ka jingïateh lok bad ka DMK, da kaba khot ïa katei ka “jingdonkam jong ka por” ban ïakhun pyrshah ïa ka BJP.
Hadien kata, ka DMK ka la ai khusnam ïa u Haasan da kaba pynsuk ïa u ban rung sha ka Rajya Sabha, bad ïa ki jingïamir jingmut kiba dang ïaid shakhmat la ïohi ba ki long kiba kongsan bha na ka bynta ka MNM ban ker kut ïa ka bynta kaba don jingmut ha ka jingïatylli katba ka dang pynkhreh ïa ka ilekshon dorbar thawaiñ kaba nyngkong kum ka seng ïatreilang ba synshar hakhmat eh.
