New Delhi, Nailur:
Ka kynhun Central Bureau of Investigation (CBI) ha ka sngi Palei ka la mudui ïa ka jingshah kynnoh ba la pynïasoh lang ha ki ar tylli ki mukotduma kiba ïadei bad ka jingkynnoh ba don ki kam thok hapdeng ki kompeni kynhun jong u heh spah u Anil Ambani, ka Yes Bank bad ki kompeni ba dei trai da ki bahaïing hasem jong u CEO barim jong ka bank u Rana Kapoor.
La jer kyrteng ïa u Ambani kum uba kynnoh ha ka kot mudui ba la ai ha ka ïingbishar jong ka Mumbai ryngkat bad u Rana Kapoor, ka kurim bad ki khun kynthei jong u, bad katto katne tylli ki kompeni, ong ka kyrwoh jong u nongaiktien ka kynhun CBI.
Ki mukotduma, kiba la mudui ha u snem 2022, ki dei kiba ïadei bad ki jingpynïaid kam hapdeng ka Reliance Commercial Finance Ltd (RCFL) bad ka Reliance Home Finance Ltd (RHFL) bad ka Yes Bank bad ki kompeni ba dei trai da ka kurim jong u Kapoor, ka Bindu Kapoor bad ki khun kynthei jong u, ka Radha Kapoor bad ka Roshni Kapoor, ong ka kyrwoh khubor.
U Anil Ambani u dei u Chairman jong ka ADA Group bad u Director jong ka Reliance Capital Ltd kaba dei ka kompeni ba bat ïa ka RCFL bad ka RHFL, ong ka kynhun CBI.
“Ka jingtohkit ka la lap ba ka Yes Bank ka la bei tyngka haduh T.2045 klur ha ki ram bym lah ban pynkylla bad ki ram khaïi jong ka RCFL bad T.2965 klur ha ki ram bym lah ban pynkylla bad ki kot khaïi jong ka RHFL ha u snem 2017 halor ka jingmynjur jong ka Rapote Group A Raspial . ki kompeni ‘hapoh ka jingpeitngor’ namar ka jingsniew ka jinglong jingman ha ka liang ka pisa tyngka bad ka jingkheiñ jingdiah kaba sniew ïa ka ïew ka hat. Ki pisa, kumta, ba la bei ha ka RCFL bad RHFL da ka Yes Bank hadien la pynsaphriang lyngba ki rukom treikam ba bun jait, kaba pyni ïa ka jingpynkylla ïa ka pisa paidbah ha ka rukom kaba ryntih,” ong u nongaiktien jong ka CBI ha ka kyrwoh.
“Kum ka nong kylliang, u Anil Ambani u la ïoh ïa ki jingai ram ba la mynjur na ka RCFL bad RHFL ha ka dor ba la pynduna sha ki longïing kiba pynduhnong ïa ka Rana Kapoor kata ki kompeni ba la long trai da u Bindu Kapoor (ka tnga), ka Radha Kapoor bad ka Ms Roshani Kapoor (ki khun kynthei),” ong ka kynhun CBI.
“Kane ka jingpynbeit thok ka la wanrah ïa ka jingduhnong kaba bakla bad kaba khraw ïa ka Yes Bank (kaba kot sha ka T.2796.77klur) bad ka jingmyntoi kaba ïadei bad kane ka RCFL, RHFL bad kiwei-kiwei ki kompeni jong ka ADA Group bad kumjuh ruh ïa ki kompeni kiba dei trai da ki bahaïing hasem jong u Rana Kapoor,” la pynbna ka tnad.
Nalor kata, ka kynhun CBI ka la ong ba ka Reliance Nippon Mutual Funds (kawei pat ka kompeni jong ka Reliance Capital Ltd), katkum ka jingbthah jong u Anil Ambani ka la bei tyngka haduh T.1160 klur ha u snem 2017-18 ha ki ram bym lah ban pynkylla jong ka. Ka Reliance Nippon Mutual Funds ka la thied ruh ïa ki ram jong ka ADA Group kiba shongdor haduh T.249.80 klur na ka Yes Bank.
Shuh shuh ka kynhun CBI ka la kynnoh ba ka Reliance Nippon Mutual Funds ka la thep pisa ruh haduh T.1750 klur ha ki tiar ram ba khlem pynskhem (AT1 Bonds) jong ka Yes Bank.
“Kine ki bond kiba don ka jingma kaba khraw/kiba heh ka bainong kim shym la don ka tarik ba la buh ban siew bad lah ban pynkylla sha ka Equity lane ban thoh noh shi syndon lada jia ba don ka jingeh. Lah ban pynkynmaw ba ki AT1 Bonds ki don ha ka kyrdan kaba kham poh ïa kiwei pat ki ram lada jia ba ki shah pynduh noh”.
