New Delhi, Nailur:
Ka jingshlur bad ka jingsngewskhem ha kaba ki shipai ki la pynlong ïa ka ‘Operation Sindoor’ pyrshah ïa ka Pakistan, ka jingïaleh pyrshah beit jong ka India ïa ka jingshah thombor ha Pahagam, ka la pynshisha ba ka jingjop kam dei shuh ka jingïapher na ka bynta ka ri hynrei ka dei ka jingmlien, ong u myntri ka tnat ïada ri ka sorkar pdeng u Rajnath Singh ha ka sngi Thohdieng ha ka jingïalang ban rakhe ïa ka Diamond Jubilee jong ka thma 1965 hapdeng ka India-Pakistan. “Ngi dei ban pynneh beit ïa kane ka jinglong”, la ong u Singh.
Ka jingïakhun ki shipai hapdeng ka India bad ka Pakistan ha u bnai Jymmang 2025, u la ong, ka la pyni ïa ka jingkhlaiñ jong ka ri ha ki nongshun jong ka bad ka la long kum ka jingpynshisha ba ka la thaw ïa la ka jong ka lawei lyngba ka jingkut jingmut kaba skhem jong ka.
“Ka jingthombor jong ki lehnoh ha Pahalgam ka dang pyndap ïa ki dohnud jong ngi da ka jingkhuslai bad jingsngewsih. Ka la pynkyndit ïa ngi, hynrei kam shym la pynduh noh ïa ka jingskhem jingmut jong ngi. U Myntri Rangbahduh u Narendra Modi u la bam smai ban ai jingsneng ïa ki lehnoh kaba kim pat ju tip bad mad. Ka Operation Sindoor ka pyni ïa ki nongshun ba haduh katno ngi khlaiñ,” la ong u Singh, ha ka jingïakren bad ki riewpawkhmat bad ki bahaïing jong kito ki riewshlur kiba la ïap martir ha ka thma 1965.
Ka India ka la sdang ïa ka ‘Operation Sindoor’ ha ka por mynstep jong ka 7 tarik u Jymmang bad ka la thombor ïa ki lehnoh bad ki jaka sah jong ki shipai ha Pakistan bad ha Pakistan-occupied Kashmir ha ki saw sngi hadien ka jinghiar thma ha Pahalgam ha ka 22 tarik u Ïaïong, ha kaba 26 ngut ki briew ki la ïap.
Hapdeng ka jingsdang ïa ka jingkhynra bad ka jingsangeh ïasiat ha ka janmiet jong ka 10 tarik Jymmang, ki shipai India ki la ther bom ïa ki khynrai tylli ki ktem lehnoh ha Pakistan bad ka Pakistan-occupied Kashmir, ha kaba ki la pynïap ym duna ïa ka 100 ngut ki lehnoh, bad ki la siat ïa ki thong ha ki 13 tylli ki ktem liengsuiñ jong ka Pakistan bad ki jaka bur tiar jong ki shipai.
Ha ka jingkren jong u, u Singh u la ai burom ïa ki riewshlur kiba la leh ïa ka jingaiti kaba khraw tam ha ka kam jong ki 60 snem mynshwa bad kito kiba la pynthikna ba ka India kan mih kum ka nongjop ha ka jingtynjuh ïa ka bor.
“Ka Pakistan ka la pyrkhat ba ka lah ban pyntieng ïa ngi lyngba ka jingwan rung tuh, ki buit lehnoh bad ki jinghiar thma ba kyndit, hynrei khyndiat eh ka la tip ba uwei pa uwei u shipai India u shakri ïa ka ri da ka jingsngew ba ka jinglong trai bad ka jinglong ba janai jong ka jaitbynriew kan ym shah pynthut satia ha kano kano ka dor”, la ong u Singh.
U Myntri u la ai burom ruh ïa ka mon jong ka saiñ pyrthei bad ka jinglong nongïalam jong kata ka por, bad u la ong, “Ym don ka thma kaba ïaleh tang ha madan thma; ka jingjop ha ka thma ka dei ka jingmih na ka jingkut jingmut lang jong ka jaitbynriew baroh kawei. Ha kata ka por ha ka snem 1965, ka ri India ka la lah ban ïakynduh ïa ka jingbym thikna bad ki jingeh, ruh namar ka jinglong nongïalam kaba khlaiñ jong u Lal Bahadur Shastri ji.
Ym tang ba u pynbiang ïa ka rai ha kaba ïadei bad ka jinglong nongïalam ha ka saiñ pyrthei, hynrei la kyntiew ruh ïa ka mynsiem jong ka jaitbynriew baroh kawei sha ki kyrdan kiba kham jrong Wat hapoh ki jinglong kiba sniew, ngi la pyni ïa ka jingïatylli bad ngi la jop ïa ka thma.”
Ha kane ka sngi la donlang ki heh ophisar, ba kynthup ïa u Chief General Upendra Dwivedi, u heh shipai jong ka Western Army u Lieutenant Manoj Kumar Katiyar bad u General Officer Commanding (Delhi Area) u Lieutenant General Bhavnish Kumar.
