New Delhi, Nailur:
Ka Ophis jong u Chief Electoral Officer (CEO) ha West Bengal, ka la sdang ïa ka jingpynkhreh na ka bynta ka Special Intensive Revision (SIR) jong ka thup kyrteng nongthep vote, kaba la thmu ban sdang hadien ka Lakshmi Puja ha ka 6 tarik Risaw, ong ka khubor ba la ïohlum.
Kane ka jingpyntreikam kan long shi bynta na ka jingïakhih ha baroh kawei ka ri da ka tnad ilekshon jong ka Ri India.
Kum shi bynta jong ka jingtrei nongrim, ka jingpynïadei ïa ki jingtip na ka SIR jong u snem 2002 bad ka thup nongthep vote jong u bnai Kyllalyngkot 2025 ha Bengal ka la dep hynnin ka sngi, la pynthikna ki tyllong khubor na ka ophis jong u CEO.
Ha kajuh ka por, ka ophis jong u CEO ka la dep ban sdang kloi ïa ka jingpynkhreh na ka bynta ka ilekshon sha ka iing dorbar thawaiñ jong ka West Bengal ha u snem 2026.
Ha kane ka sngi Palei, ka ophis ka la plie paidbah ïa ka Election Manpower Management System (EMMS) 2.0 portal, ha kaba yn pyndonkam ban pynsuk ïa ka rukom thungkam bad pynïaid ïa ki briew ban thep vote.
Naduh ka sngi Thohdieng, yn pyndonkam ïa ka EMMS 2.0 portal ban pynkhreh ïa ka jingtip jong ki nongtrei thep vote ha kylleng ki jaka treikam ba jan 32,000 tylli ha ka jylla. Da ka jingkhmih lynti ban pynbun kumba 14,000 tylli ki jaka thep vote, ki heh sorkar ki khmih lynti ba kan don ka jingduna kaba jur bha jong ki Ophisar ha ka kyrdan jong ki jaka thep vote (BLO).
Ban weng ïa kane ka jingeh, la dep ban thung katto katne ngut ki nongtrei ilekshon kum ki BLO.
Ka ophis jong u CEO ka la bthah ïa baroh 32 hajar tylli ki ophis sorkar ba kin thep ïa ki jingtip jong ki nongtrei jong ki ha ka EMMS 2.0 portal.
Lada ym lah ban kohnguh kan khot ïa ka jingpynngat kaba tyngeh katkum ka Representation of the People Act, 1951, bad u heh ophisar uba hakhliehduh ha kawei pa kawei ka ophis un kitkhlieh.
Ka EMMS 2.0 portal kan treikam kum ka rynsan Digital na ka bynta ki bor synshar distrik ban pynïaid ïa ki briew ha ka ilekshon, kynthup ïa ka jingpynrung kam, ka jingpynkynriah kam, ka jingpynbeit, bad ka jingpynshisha ïa ki nongtrei.
Kan ailad ïa ki bor synshar ban pynneh ïa ki jingthoh ba la pynthymmai jong ki briew kiba ïadei bad ka ilekshon, kumjuh ruh ban pynrung ïa ki nongtrei kiba thymmai ne ban weng ïa kito kiba la shongthait ne kiba la shah pynkynriah kam namar ki daw kiba kyrpang.
Ïa kane ka jingtip yn pynneh pynsah da ki Cell kiba don ha ka kyrdan distrik bad ha ka kyrdan block.
Ha shwa ka jingpyntreikam ïa ka SIR, ka Election Commission ka thmu ban shna ïa ka thup jingtip kaba bniah jong ki nongtrei ilekshon bad ban buddien thikna ïa ka jingdon jong ki nongtrei baroh kiba don ha ka jylla.
Ïa ka EMMS 2.0 portal la shna kum ka jingtreilang hapdeng ka National Informatics Centre (NIC) bad ka Ophis jong u Heh Ophisar ka tnad Electoral, West Bengal.
Ïa kane ka portal la plie paidbah da u Joint Director ka NIC u Saikat Narayan Bhattacharya bad u Shamik Kumar Bhattacharya, ha ryngkat u Additional Chief Electoral Officer u Arindam Niyogi bad u Deputy CEO u Sumanta Ray.
Mynta dang sah ban peit haduh katno ka tnad ilekshon kan lah ban pyndonkam hok ïa ka rynsan EMMS 2.0 ban pynkhreh ïa ka thup kaba khlaiñ jong ki nongtrei ilekshon shwa ka ilekshon 2026.
