New Delhi, Nailur:
Ha kawei ka jingjia kaba kham paw paidbah, uwei u heh nongïalam jong ka kynhun lehnoh Lashkar-e-Taiba (LeT) u la kam ba ka jaka sah jong katei ka seng ha Muridke, Pakistan, ka la shah pynpra ha ka jingkhynra ki shipai India.
Ha ka durkhih kaba la saphriang ha ki Social Media, la ïohi ba u dkhot jong ka LeT, u Qaasim, u ïeng hakhmat katei ka jaka kaba la shah pynjot, kaba la tip kum ka Markaz Taiba, bad pynthikna ba ïa katei ka jaka, la shna biang, ba kan long ” kaba kham heh ban ïa kaba mynshwa.” Kane ka jingkren ka pyrshah beit ïa ka jingong jong ka Sorkar Pakistan ba katei ka jaka kam shym la pyndonkam shuh da ka seng lehnoh.
“Nga ïeng halor ki jingjot jong ka Markaz Taiba ha Muridke, kaba la shah pynjot ha ka jingshah thombor jong ki (India). Ka jingtrei ban tei pat ïa ka ka dang ïaid shakhmat. Da ka jingaiei jong u Blei, ïa kane ka Mosque yn tei kham heh ban ïa kaba mynshwa,” la kam u Qaasim ha ka durkhih.
U Qaasim u la pynpaw shai ba ïa kane ka jaka la pyndonkam ban ai jinghikai ïa ki lehnoh bad ki samla pule, bad u la kyntu ïa ki samla Pakistan ban ïashim bynta ha ka prokram ai jinghikai jihadist jong ka. Ha kawei ka durkhih ba kyrpang, u Saifullah Kasuri, uba dei u symbud nongïalam jong ka LeT, u la kynnoh ba ïa kane ka jingshna thymmai, la bei pisa da ka sorkar bad ki shipai jong ka Pakistan.
Kane ka durkhih ka la paw katto katne sngi hadien ba u JeM Commander u Masood Ilyas Kashmiri u la kam ba ki shipai India ki la pynpra ïa ka longïing jong ka longïing jong u Masood Azhar ha ka por jong ka Operation Sindoor, kaba la sdang da ka India ban pynduh jait ïa ki jingtei jong ki lehnoh kiba don hapoh jong ka Pakistan.
Ha ka durkhih ba la saphriang bha, u heh ka JeM u Masood Ilyas Kashmiri u kren halor ka jingthombor jong ka India ha ka 7 tarik Jymmang. “Da kaba pdiang ïa ki kam lehnoh, ngi la ïakhun ïa ka Delhi, Kabul bad Kandahar ban ïada ïa ki khappud jong kane ka ri. Hadien ba ngi la aiti lut ïa kiei-kiei baroh, ha ka 7 tarik u Naitung, ka longïing jong u Maulana Masood Azhar ka la shah pynpra ha ki shipai India ha Bahawalpur,” ka Hindustan Times ka la sot ïa ka jingkren jong ka Kashmiri ha ka ktien Urdu.
Hadien ka jinghiar thma jong ki lehnoh kaba la pynïap briew ha ka 22 tarik, Ïaïong ha Pahalgam, India, ha ka 7 tarik Jymmang, ka la thombor ïa ki khyndai tylli ki jingtei jong ki lehnoh ha Kashmir bad Pakistan ba la bat da ka Pakistan, ha kaba palat 100 ngut ki lehnoh ki la ïap. La ïathuh ba ym duna ïa ka 10 ngut ki bahaïing jong U Azhar, ki la ïap ha katei ka jingshah thombor, kynthup ïa ka kurim jong u.
Ki jinghiar thma, kiba la pynlong da kaba pyndonkam da ki tiar ïaleh kiba lah ban ïeng, ki Drone, bad ki tiar ïaleh kiba la pynïaid da kaba thikna, ki la pynleit jingmut ha kaba pynpra ïa ki jingtei jong ki lehnoh katba ki kiar na ki jaka buh shipai jong ka Pakistan. Ki jaka ba kongsan ba la shah ktah ki kynthup ïa ka Muridke, kaba don hajan Lahore, kaba don ïa ka jaka sah jong ka Lashkar-e-Taiba (LeT) kaba heh bha, bad ka Bahawalpur, ka ktem ba kongsan jong ka JeM ha ka jylla Punjab jong ka Pakistan.
Kiwei pat ki thong ha ki jaka ai jinghikai LeT bad JeM kiba la slem bha kiba don ha PoK-Kotli bad Muzaffarabad. Kiwei pat ki jaka ba la shah pynjot ki kynthup ïa ka ktem jong ki kynhun lehnoh Hizbul Mujahideen ha Sialkot bad ka Markaz Ahle Hadith jong ka LeT ha Barnala.
