New Delhi, Nailur:
Ka kynhun Enforcement Directorate ha ka sngi Ba-ar ka la kurup ïa ki jingdon jingem kiba shongdor haduh T.7.44 klur kiba ïadei bad u nongïalam ka Aam Aadmi Party (AAP) u Satyendar Jain ha ka mukotduma PMLA.
Ka kynhun ED, ha ka kyrwoh, ka la ong ba ka la pynmih ïa ka hukum ba shipor katkum ka Prevention of Money Laundering Act (PMLA) ha ka 15 tarik u Nailur ban kurup noh ïa ki jingdon jingem ki bym lah ban pynkhih, la ïathuh ka tyllong khubor.
Ka jingtohkit ka dei halor ka jingkynnoh ba don ki jingdon jingem ba kamai bymhok bad buh kyrpang ïa ki jingdon jingem pyrshah ïa u Jain, ka kurim jong u ka Poonam Jain bad kiwei pat.
Ki kynhun tohkit ka sorkar pdeng ki la kynnoh ba u Jain u la lum ïa ki jingdon jingem da ka lynti kaba beaiñ hapdeng u snem 2015 bad 2017 katba u dang trei kum u Myntri ha ka sorkar Delhi hapdeng ka 14 tarik u Rymphang, 2015, haduh ka 31 tarik u Jymmang, 2017.
Ka kynhun ED hashwa ka la kurup ïa ki jingdon jingem kiba la kot sha ka T. 4.81 klur jong u Jain ha u snem 2022.
Ha u bnai ba la dep, u nongïalam ka AAP u la ïoh ïa ka jingpynlait na ka ïingbishar ha ka mukotduma bamsap hadien ba ka tnad tohkit jong ka sorkar pdeng ka la aiti ïa ka kaiphod ban khang noh.
Kane ka mukotduma ka dei halor ka jingai Tender sha kawei ka kompeni shimet ha ka por ba u dang long u Myntri ka Public Works Department.
