Srinagar, Nailur:
Ki jingpyntreikam pyrkhing katkum ka kyndon 163 ki la bteng ha ki jaka ba la shah ktah na ki jingïakynad ha ka sngi Palei, shi sngi hadien ba la jia ka jingïakynad halor ka jinglong jylla bad ka jingdawa jong ka Sixth Schedule kaba la pynlong ïa saw ngut ki briew ba kin ïap bad 80 ngut ki la mynsaw, ryngkat bad ka jingpakhang ha ka jaka ba marjan ka Kargil.
Ki pulit bad ki shipai ki la pynjari da ka bor ha Leh distrik kaba la shah ktah ha ka jingkulmar bad ki dang peitngor bha ïa ka jinglong jingman.
Ki dukan, ki jaka khaïi, ki ophis sorkar bad ki jaka pule ki dang khang ha ka distrik ha ka sngi Palei.
Uwei u heh pulit u la ong ba ki jingpyrkhing katkum ka kyndon 163 jong ka BNSS ki dang pynjari da kaba tyngeh.
“Ka jinglong jingman ka don hapoh ka jingpynïaid bad la buh ïa ki bor pahara kiba biang ha ki surok ban pynneh ïa ka suk ka saiñ bad ka jingsuk”, u la ong.
Ki la don saw ngut ki briew kiba la ïap bad 80 ngut kiwei pat ki la mynsaw, katto katne na ki ki la mynsaw jur, ha ka jingïakynad kaba jur hapdeng ki samla kiba ïakhih bad ki bor pahara ha ka sngi Balang ha Leh distrik
Da ki spah ngut ki samla ki la mih sha ki surok ha Leh ha katei ka sngi ban pynlong ïa ka jingïakhih ban kyrshan ïa ka jingdawa jong ki ban ai ïa ka kyrdan Sixth Schedule bad ka jinglong jylla ïa ka Ladakh UT, kaba la shah pynïakhlad na ka jylla J&K barim.
Kane ka jingïakhih ka la kylla long ka jingïakynad naba ki samla kiba la dap da ka jingbitar ki la thang ïa ka ophis jong ka seng BJP, ka CEC Leh Hill Council office, ki kali pulit bad CRPF bad pynjulor ïa kiba bun ki jingdon jingem jong ki riewpaidbah bad ki kali sorkar.
