Lucknow, Naillur:
Khnang ban ïakhun pyrshah ïa ka politik jong ki liang pyrshah halor ka jaitbynriew bad ban rah ïa ka agenda jong ka roi ka par shakhmat, u Myntri Rangbah ka Uttar Pradesh u Yogi Adityanath u la kyntu ïa ki seng ba la ïatreilang jong u ha ka kynhun Myntri ban pynpaw pyrthei ïa ka jingbamsap ha ka por ba synshar ka seng Samajwadi Party sha ki paidbah.
Hadien ba u la long u nongpynïaid ïa ka jingïalang jong ka kynhun Myntri ha ka janmiet jong ka sngi Thohdieng, u Yogi u la ïakynduh ïa ka Council of Minister ha ka ophis treikam jong u, la ïathuh ki tyllong khubor.
Uwei u Myntri ba rangbah uba la mih na ka jingïalang u la pynthikna ba u Myntri Rangbah u la kyrpad ïa ki ban pyrshah ïa ki jingthombor jong ka Samajwadi Party da kaba kdew ïa ki kam bamsap ha ka por ba dang don ka sorkar SP.
La pynkynmaw kyrpang ïa ki khubor bamsap ha ka jingtei ïa ka Jayaprakash Narayan International Centre bad ka projek Gomti Riverfront, bad la bthah ïa ki Myntri ban kren shaphang baroh ki kam bamsap ha ka por ba dang synshar ka sorkar SP, la bynrap shuh shuh u Myntri.
Uwei pat u Myntri u la sot na ka jingkren jong u Yogi u la kdew ba ka jinglut jong katei ka projek harud wah ka la poi sha ka T. 1,800 klur.
U la ong ba la pynpaw shaphang ka jingpynkiew dor khlem batai ïa ka jinglut jingsep kaba la tyrwa na ka bynta ka surok Purvanchal Expressway da ka sorkar SP bad kumno ïa kajuh la pynhiar da ka sorkar jong u.
U la ong ba ki don ki kam bamsap ha ka Samajwadi Pension Scheme ba la sdang da ka sorkar SP bad u Myntri Rangbah u la kyrpad ïa ki Myntri ban ïathuh sha ki paidbah shaphang kumno ïa ka pisa kaba la thmu na ka bynta ka penshon jong ki baduk la pynkylla lad jingïarap sha kito kiba ïajan bad ki ha kata ka por.
La ïathuh ba u Myntri Rangbah u la khot ïa ki Myntri ban pyrshah jur ïa ka politik jaitbynriew jong ka liang pyrshah bad ba kin poi sha ki paidbah da ka khubor jong ka roi ka par.
