New Delhi, Naillur:
U Rahul Gandhi, u nongïalam ka seng Congress, u la ïakren bad u Myntri Rangbah ka Tamil Nadu, u M.K.Stalin bad ïa u President jong ka TVK, u Vijay, hadien ka jingïakynduh jingeh jong ka Jylla na ka jingdon ka jingjia ïaïuh para briew ha ka jingïalang paidbah jong ka seng saiñ pyrthei ha Karur, kaba la shim noh mynta ïa ka jingim jong ki 41 ngut ki briew.
Ki pulit jong ka Karur ki la mudui mukotduma da kaba kynnoh ïa ka jingbym shimkhia ïa ki nongkitkam jong ka TVK, katba ki kynhun wadbniah ki la sdang ban tohkit, kynthup ïa ka jingpeit bniah ïa ka jaka ba la ïathuh ba la lap ïa ki katto katne ki met ïap hajan kawei ka nala um.
U Gandhi u la ïakren bad u Stalin lyngba ka phone, da kaba kylli jingkylli shaphang kane ka jingjia bad ka rukom sumar ïa kiba mynsaw. U Stalin u la pdiang ïa ka jingthoh lyngba ka rynsan X, da kaba ai khublei ïa u Gandhi na ka bynta ka “jingsngewkhia kaba naduh ka dohnud” bad jingkyrshan jong u.
U Gandhi u la phone ruh ïa u heh jong ka Tamilaga Vettri Kazhagam (TVK) u Vijay ban pynpaw ïa ka jingsngewlem halor ka jingïap jong ki nongkyrshan jong u.
Ka jingïakhih ka la jia ha ka jingïalang paidbah ba la ïalam da ka TVK ha ka 27 tarik u Nailur bad ka la pynmynsaw ïa palat 60 ngut, ha kaba ym duna ïa ka arngut ki don ha ka jingshitom kaba jur bha.
Halor ka jingshah kynthoh kaba nang jur, u Vijay u la pynbna ban siew bai lutksan kaba mar T.20 lak na ka bynta ki bahaïing jong kiba la khlad noh.
Ka TVK ka la pynkynriah ruh ïa ka Madras High Court’s Madurai Bench, da kaba pan ïa ka kynhun CBI lane ka jingtohkit ba laitluid halor kane ka jingjia.
