Srinagar, Nailur:
Ki briew jong ka Ladakh ki la ju dawa ban pynrung ïa ka Union Territory ha ka khyrnit kaba hynriew jong ka Riti synshar ka ri. Ka khyrnit kaba hynriew jong ka Riti synshar ka ri ka don ïa ka kyndon 244(2) bad 275(1), kaba thoh kumne, “Ki kyndon ha kaba ïadei bad ka jingpynïaid ïa ki jaka riewlum ha ki jylla Assam, Meghalaya, Tripura bad Mizoram.”
Ki jingpyrkhing hapoh ka kyndon 163 jong ka BNSS, 2023 ka dang bteng na ka bynta ban pyntreikam ha Leh hadien ba la jia ka kam pyntriem ha ka 24 tarik Nailur. Ka jingïalum san ne palat ki briew ka long kaba la shah pyrkhing ha ka distrik, ym dei ban don ka jingïaid kynhun, jingïaid ne jingïalang paidbah khlem da ïoh shwa ka jingbit.
Hadien ha ka 26 tarik u Nailur, ki pulit ki la siat ha ka por ba ki ïakhih, kaba la pynlong ïa ki briew ban ïap. Lah ban kdew hangne ba u Wangchuk u dei uba la shah kem hapoh ka aiñ National Security Act (NSA) bad mynta u don ha phatok Jodhpur ha Rajasthan. U la shah kynnoh ba u dei u nongsdang ïa ka jingïakhih.
Napdeng kine kiba la shah kem ki dei u Sonam Wangchuk, u riew ïakhih ba pawnam bad u nongïakhih na ka bynta ban pyntreikam ïa ka 6th Schedule ha Ladakh. U la don ha ka jingshah thngan, kaba u la pynkut noh tang mar ïa sdang ka jingïakynad.
Shisngi shwa kane, u President ka JKPCC, u Tariq Hameed Karra, u la ai jingkren ha ki jingïakhih ha Ladakh.
Haba kren bad ki lad pathai khubor, u la kynnoh ba kane ka jingïakhih kaba dang ïaid shakhmat ka dei ka jingmih na ka jingleh thok kaba la neh san snem bad ki jingkular bym lah ban pyndep.”Ka jingïakhih kaba mynta ka dei ka jingmih na ka jingleh thok jong ki san snem ba la dep bad ka jingbym pyndep ïa ki jingkular…” ong u Karra ha ki nongthoh khubor.
Ha ka jingïakren halor ka jingïakhih ha Ladakh bad ka jingïakynad kaba la mih na ka, u Karra u la kynnoh ba ki nongïakhih kiba mynta ki dei ki juh ki briew kiba la rakhe ïa ka jingpyndam noh ïa ka kyndon 370 bad kiba la pyndonkam da ka sorkar ha katei ka por.
“Mynta ka sngi, ngi kwah ban kren ïa ka mat kaba khia bha bad kaba donkam ïa ka ri: ka jinglong jingman ha Ladakh. Saw ngut ki briew ki la dep ïap, bad kumba 90 ngut ki la mynsaw… Kito kiba ïakhih pyrshah ïa ka Sorkar India bad ka jingsynshar shnong ki dei ki juh ki briew kiba la pyndonkam da ka sorkar ha ka por ba pynduh ïa ka Article 370…” ong u Karra.
