Chennai, Nailur:
Ki pulit jong ka nongbah Chennai, ha ka lah sngi U Blei, ki la buh jingmudui pyrshah ïa ki 25 tylli ki Social Media Account, halor ka jingkynnoh ba ki la pynsaphriang ïa ki khubor lamler, ha kaba ïadei bad ka jingjia jong ka jingïaïuh para briew ha Karur, kaba la shim ïa ka jingim jong ki 41 ngut ki briew.
Ki pulit ki la maham shuh shuh ba yn shim da ki kyndon aiñ kiba tyngeh pyrshah ïa kino kino kiba buh ïa ki jingthoh ha ki Social Media kiba wanrah jingtieng ne pynthut ïa ka shongsuk shongsaiñ.
Ha ka jingpynbna pathai khubor, ki pulit ki la ong ba ki don ki katto katne ki briew kiba pynphriang ïa ki khubor khlem nongrim da ka Online, kiba buh jingma ïa ka jingsuk jong ki paidbah bad kiba pynmih ïa ka jingtieng. Da kaba pynshong nongrim ha ki jingujor ba la ïoh, la pynngat ïa ki nongleh kam sniew bad kan sa bud sa ka jingleh kaba kham bniah, la ong ka khubor.
Ki bor pynïaid ki la ïathuh ba ka sorkar ka la dep ban shim ïa ki lad ki lynti kiba biang hadien katei ka jingjia kaba sngewsih bad ki la kyntu ïa ki paidbah ba kin kiar na kaba pynphriang ïa ki jingtip kiba bakla tad haduh ban da pyndep ïa ki jingtohkit.
