New Delhi, Risaw:
Da ka jingdon bad ka jingpyntreikam da ki Drone naduh shwa ban rakhe ïa ka jinglehniam Puja ka jingleit jingwan bad ka jingrakhe lehniam ka la ïaid beit ha kaba kane ka la buh jingshngaiñ shibun ïa ki riewngeit. La pynkhlaiñ ïa ka jingpahara ha kylleng ki saw tylli ki distrik jong ka Bareilly Division ha kaba ki pulit, ki PAC, bad ki shipai RAF ki la mih ha ki surok bad ki Drone ha suiñ ha ka sngi Palei ha kaba ïadei bad ka Dussehra, la ïathuh ki heh sorkar.
Ha ka 26 tarik u Nailur, ka jingïalang jong ki briew kiba don kumba 2,000 ngut eiei shabar jong kawei ka Mosque ha ka thaiñ Kotwali hadien ka jingduwai jong ka sngi Thohdieng, ka la pynlong ïa ka jingïakynad bad ki pulit, ha kaba la kynthup ïa ka jingïa kawang maw.
Kane ka jingkulmar ka la mih na ka jingpynsangeh noh ïa ka jingïakhih halor ka jingïakhih poster ‘I Love Muhammad’ kaba la khot da u lyngdoh niam u Tauqeer Khan.
U Divisional Commissioner u Bhupendra S Chaudhary u la pynmih ïa ka jingmaham kaba khraw na ka bynta ki distrik ba kynthup ïa Bareilly, Shahjahanpur, Pilibhit, bad Budaun.
La bthah ïa ki pulit ba kin long kiba husiar ha ki madan jong ka Ramlila, ha ki jinglehniam Durga Puja bad ha ki prokram Ravan Dahan, kiba khring ïa ki paidbah kiba bun bha.
“Baroh ki Majistor distrik, ki Deputy Collector, ki pulit bad ki heh sorkar ki dei ban pyndep hok ïa la ka kamram. Kano kano ka jingbakla kan khot ïa ka jingleh kaba tyngeh,” la ong u Chaudhary.
Ki heh sorkar ki la ïathuh ba ki tnad wad bniah, ruh, la buh ha ka jingpynkhreh bad la pynjari ïa ki kynhun ha katei ka jaka.
“Ki pulit kiba don tiar ki dang shah buh ha ki jaka kiba khia. Ngi pynthikna ïa ki jingpynbeit kiba khlem jingbakla khnang ba ki jingkulmar kiba la sakhi ha Bareilly kin ym tuid sha ki distrik ba marjan,” ong uwei u heh sorkar.
Haduh ka sngi Balang, ki don 81 ngut ki briew kiba la shah kem ha kaba ïadei bad ka jingshah thombor ha ka 26 tarik u Nailur.
