Raipur, Risaw:
Ki la don baroh kumba 103 ngut ki dkhot jong ka kynhun lehnoh CPI (Maoist) kaba la shah ñiew beaiñ, ba kynthup ïa ki 49 ngut kiba shah thong ha ka khlieh jong ki kaba haduh T. 1.06 klur, ki la leit pyndem noh ïalade ha ka Bijapur distrik jong ka Chhattisgarh ha ka sngi Palei.
Kane ka sienjam ka la jia katto katne sngi hadien ba u Myntri ka tnat ki kam pohïing u Amit Shah u la kyntait ïa ka jingtyrwa ban sangeh ïasiat ba la tyrwa da ki Naxal, da kaba ong ba ki long kiba la pdiang sngewbha ban pyndem wait bad ba ki bor pahara kin ym siat wat tang uwei u kuli ïa kito kiba buh noh ïa ki tiar ïaleh.
Ki pulit Bastar ki la pynmih ïa ka thup kaba pynpaw ïa ki jingtip ba bniah jong ki shipai kiba la aiti noh, kaba kynthup ïa ki heh ophisar bad ki shipai kiba kham poh kyrdan. Katkum ka thup ba la pynmih da ki pulit, ki lehnoh kiba la aiti noh kiba don ha ka rta kaba 18 haduh 40 snem ka rta ki la iehnoh ïa katei ka kynhun ba la khang bad ki la rai ban wanphai biang sha ka imlang sahlang kaba rim.
“Katto katne ngut ki dkhot jong ka Revolutionary People’s Committee, ki nongïalam jong ka Area Committee, ki heh shipai bad ki nongbud jong ka CPI (Maoist) ki don napdeng ki 103 ngut kiba la pyndem wait. Kine ki lehnoh kiba la leit ban pyndem kin sa ïoh ïa ki jingïarap kaba la buh mar T. 50,000. Kine kiba la leit ban pyndem kin sa ïoh ïa ki jingmyntoi halor ka polisi jong ka jylla ba la mang na ka bynta ka jingleit phai jong ki sha ka jingim kaba bha, la ong”, la ong u Jitendra Yadav, u heh pulit jong ka Bijapur distrik.
Hapoh ki jingtreikam jong ka Surrender and Rehabilitation kaba thymmai jong ka jylla, ki dkhot ba la leit ban pyndem kin sa shah pynbiang ki ïing, ki lad jingsumar, ki jaka rep, bad kiwei kiwei ki jingdonkam, ryngkat bad ka jingkyrshan pisa ba kham bun lada ki jied ban leit sha ka jinghikai jingtbit ne sdang ïa ka kam khaïi ki barit.
