Hyderabad, Risaw:
Da kaba kynnoh ba u Myntri Rangbah ka Jylla u A Revanth Reddy um shym la lah ban pyllait pisa na ka bynta kiba shah ktah ha ka jingshlei um ha Kamareddy distrik, u nongïalam ka BRS uba dei ruh u Myntri barim u T Harish Rao ha ka sngi U Blei u la kylli ïa u “kan myntoi aïu ban bteng kum u Myntri Rangbah lada phim lah ban ïarap ïa ki paidbah”.
U Harish Rao, ha ryngkat u Myntri barim u Vemula Prashanth Reddy bad u MLA barim u J Surendar, ki la leit jngoh ïa ki jaka ba la shah ktah ha ka jingshlei um ha ka shnong Nagireddypet bad Lingampet Mandal.
Hadien kata haba kren sha ki lad pathai khubor, u la ong: “Shibnai mynshwa, katto katne ki jaka ki la shah ktah ha u slap bad ka jingshlei um.
Katto katne ngut ki briew ki la ïap, ki ïing ki la twa, ki Tank bad ki wah ki la shlei bad ki surok ruh ki la shah pynjulor.
Kine ki jingjulor ki la ktah jur ïa ka rukom im jong ki nongshong shnong ha kylleng ki jaka khamtam ha kaba ïadei bad ka jingtrei jingktah bad kumjuh ka leit ka wan jong ki kaba man ka sngi kumba la sakhi.
Ki jingthung jingtep ki la shah pynjulor ha palat 40,000 akar bad ka jinglang shyiap ka la long da ki hajar akar. Ki bor pynïaid distrik hashwa kane, ki la pynshisha ba ki jingjulor na ka jingshlei um ka la kot sha ka T. 344 klur.”
“U Myntri Rangbah u la pynlong ïa ka jingïalang ha Kamareddy. U la pynthikna ïa ki paidbah ba un sa bishar biang ïa ka jinglong jingman hadien 15 sngi bad pyllait ïa ka pisa, balei um shym la lah ban pynlong ïa ka jingïalang ban khmih bniah ha Hyderabad?” u la lyngngoh.
“Ki heh sorkar ki la tyrwa T. 344 klur sha ka jingsiew bai lutksan na ka bynta ka jingjulor ki jingthung jingtep. Hynrei haduh kine ki sngi, ka sorkar kmie kam pat pyllait wat tang 34 klur tyngka na ka bynta ka distrik. Ka sorkar ka ju ai 10,000 tyngka shi akar ka jingsiew bai lutksan. Hynrei kane ka sorkar kam pat pyllait pisa ei ei,” u la bynrap.
Haba ïadei bad ka jingtwa ka jingkieng ha Lingampet, u la ong: “Ha ka jingleit jong u, u Myntri Rangbah u la ïohi ïa ka jingkieng kaba la shah pynjulor hapdeng ka Kamareddy bad Yallareddy. Hynrei um shym la leh ei ei namar kata ki khynnah skul kim lah ban leit sha ki skul bad ki kolej.”
Une u nongïalam ka BRS u la ther tyngeh ruh ïa u District In-charge Minister u Danasari Anasuya ba la tip ruh da ka kyrteng kum u Seethakkka halor ka jingbym leit jngoh ïa ki jaka ba la shah ktah ha ka jingshlei um ha Kamareddy.
U MLA ka Siddipet u la dawa na ka sorkar jylla ba kan pyllait noh mardor ïa ka jingïarap pisa kaba T.10,000 shi akar sha ki nongrep kiba la shah pynjulor ki jingthung jingtep ha u slap bad hadien kata ka jingshlei um bad T. 1.10 lak na ka bynta kawei kawei ka longïing kaba shah ktah.
