New Delhi, Risaw:
U Myntri Rangbahduh ka ri, u Narendra Modi, u la rakhe ïa ka jingdap 25 snem jong u ha ka shuki, uba la shakri kum u Myntri Rangbah jong ka Gujarat bad mynta kum u Myntri Rangbahduh jong ka ri India, ha kaba u la batai ïa katei ka jingjop ha kaba u la ong “ka jingkyrkhu kaba khraw ïa nga na ki paidbah ka ri India.”
Ha ka 7 tarik u Risaw, 2001, u Modi u la bam smai kum u Myntri Rangbah ba 14 jong ka Gujarat.
U la iehnoh ïa ka shuki bad u la bam smai kum u Myntri Rangbahduh ha ka 26 tarik u Jymmang, 2014.
U Modi u la ïathuh ha ka rynsan ‘X’ ban ïasam ïa ka jingïaid lynti jong u, da kaba ong, “Ha kane ka sngi ha u snem 2001, nga la shah pynsmai kum u Myntri Rangbah jong ka Gujarat ha ka sien kaba nyngkong. Mynta ka sngi, kum u khlieh jong ka sorkar, nga rung ha ka snem kaba 25 jong nga ban shakri ïa ki paidbah, kiba long kum U Blei. Kane ka jingjop ha ka synshar paidbah jong ka ri India ka long ka jingkyrkhu kaba khraw ïa nga na ki paidbah jong ka ri India.”
Haba pynkynmaw ïa ki jinglong jingman ha kaba u la shimti nyngkong ïa ka kam, u la ong ba ka Gujarat ka ïakynduh ïa ki jingeh kiba khraw bha-ka jingkhynñiuh jumai kaba jur, ka eriong kaba jur bha, ki jingkyrduh kiba bud ha baroh bad ka jingbym shongsuk shongsaiñ ha ka saiñ hima sima.
“Kita ki jingeh ki la pynskhem ïa ka jingkut jingmut ban shakri ïa ki briew bad ban tei pat ïa ka Gujarat da ka jingkmen bad jingkyrmen kaba thymmai,” u la ong.
U la kynmaw ruh ïa ki kyntien jong ka kmie jong u ha ka por ba u long Myntri Rangbah banyngkong eh: “Ngam don jingsngewthuh than shaphang ka kam jong phi, hynrei nga wad tang ar tylli kiei kiei. Nyngkong, phin trei beit na ka bynta kiba duk, bad kaba ar, phin ym shim pisa satia.” U la bynrap, “Haba nga shim ïa ka jingsmai Myntri Rangbah, nga kynmaw ba i mei jong nga i la ong ïa nga… Nga la ong ruh ïa ki paidbah ba kano kano kaba nga leh kan long da ka jingthmu kaba bha tam bad kan ïoh mynsiem na ka jingthmu ban shakri ïa u briew uba khatduh eh uba ap laiñ.”
U Modi u la pyrkhat ïa ka jingkylla jong ka Gujarat hapoh ka jingïalam jong u. “Man la ka sngi, man la ka khyllipmat ha kine ki snem, nga la aiti lut ïalade ban pynbha ïa ka jingim jong ki para ri jong nga bad ban trei na ka bynta ka jingkiew jong ki.
Ka long ka bok ba bha eh jong nga ban ïoh ïa ka jingïeid kaba bteng na phi baroh,” u la ong.
Haba kdew sha ka bynta jong ki nongshong shnong ka ri, u la batai ïa ka jinglong jong ka ri India ha ka por ba u la long Myntri Rangbahduh ha u snem 2014: “Ka sorkar UPA ha kata ka por ka la long kumjuh bad ka rukom bamsap kaba sniew tam, ka jingleh paralok, bad ka jingbym lah ban treikam jong ki polisi. Ka India ka paw ba ka long kaba tlot ban pynïaryngkat bad ki ri ka pyrthei. Hynrei ka jinglaitluid jong ki briew jong ka India ka ai ka jingïatreilang bad ka jingjop ïa kiba bun bad kumjuh ban pyntikna ba ka seng jong ngi ka ïoh shisha ïa ka jingbun paid, ka sien kaba nyngkong ha ki 30 snem.”
U la pynpaw ïa ka jingkiew kaba ka India ka la leh, kaba la pyllait ïa palat 25 klur ngut ki briew na ka jingduk bad kaba la pynkupbor ïa ki kynthei, ki samla, bad ki nongrep. Da kaba pynksan ïa ka jingshaniah halade, u la khot ïa ka jingkhot, “Garv Se Kaho, Yeh Swadeshi Hai.” U Modi u la pynskhem biang ïa ka jingkular jong u ïa ka jaitbynriew:
“Da ki jinglong jong ka Riti Synshar jong ngi kum ka jingïalam ba man ka por jong nga, ngan trei shitom shuh shuh ha ki por ban wan ban pynurlong ïa ka jingangnud lang jong ngi ban ïoh ïa ka Viksit Bharat.”
