Hyderabad, Risaw:
Kum ka jingpynkhreh ïa ka ilekshon Local Body ban wan, ka BJP ka la pynlong ïa ka jingïalang jong ki nongkitkam jong ka ha ka ophis treikam jong ka jylla ha Hyderabad ha ka sngi U Blei.
Ïa kane ka jingïalang la pynïaid da u President ka jylla jong ka seng u N Ramchander Rao. Ha kane ka jingïalang la leit ban ïa shim bynta da ki heh nongïalam, ba kynthup ïa u Myntri ka sorkar pdeng jong ka tnat Coal & Mines u G Kishan Reddy, ki MP, ki MLA bad ki MLC.
U President ka BJP jong ka jylla u la khot ïa ki ban pynkiew ïa ka bhah vote jong ka seng bad ban buh ïa ka BJP kum ka lad kaba lah ban ngeit ban ïakhun pyrshah ïa ka Congress kaba bat ïa ka jingsynshar.
U la kdew ba namar ba ka sorkar pdeng ka la mang pisa kaba heh na ka bynta ki kam pynroi jong ki Local Body, ki nongïalam ka seng ki dei ban rah ïa kane ka khubor sha ki paidbah bad pan jingkyrshan na ki kyrtong ka BJP.
Ki tyllong khubor ki ïathuh ba ka jingïalang ka la rai ban pynleit jingmut ha ki konstitwensi ba mihkhmat da ki MP, MLA bad MLC ka BJP ban pynthikna ïa ka jingjop ha kiba bun ki Local Body da kaba ai ka jingïakhun kaba tyngeh pyrshah ïa ka Congress.
Ka jingïalang ka la rai ruh ban thaw ïa ka komiti kaba lai ngut na ka bynta ban jied ïa ki kyrtong, kynthup ïa ki post ZPTC bad MPTC. Yn thaw sa kawei pat ka kynhun jong ki komiti kiba don lai ngut ki dkhot kiba kynthup ïa u nongpeit ïa ka distrik, bad u President jong ka seng ha ka distrik ban peit ïa ki jingpynbeit ïa ki jingïalang paidbah.Ïa kine ki jingïalang yn ai jingkren da u State in-charge u Sunil Bansal, u Kishan Reddy bad u MoS for Home Affairs u Bandi Sanjay Kumar bad u Ramchander Rao ha ka por ba pynlong ïa ka jingïalap ilekshon.
Ki tyllong khubor ki la kdew ba ki MP barim, MLA, MLC, ki President jong ki distrik bad ki nongkitkam jong ka jylla yn thung kum ki district In-charge na ka bynta ka ilekshon ZPTC.
U Ramchander Rao u la khot ruh sa kawei pat ka jingïalang ha ka 8 tarik u Risaw bad ki MP, ki MLA, ki MLC, bad ki nongïalam ba rangbah ban pynbeit ïa ka buit treikam jong ka seng na ka bynta baroh ar ki ilekshon Local Body bad ka ilekshon shiteng samoi jong ka Jubilee Hills ban wan.
Yn thaw ZPTC ïa ka komiti ba kyrpang ban peit ïa kane ka jingïalap ilekshon ha Jubilee Hills konstitwensi.
