Chennai, Risaw:
U S Ranganathan, uba dei u trai jong ka Sresan, ka kompeni shna dawai kaba don ha Tamil Nadu, kaba shna ïa ka dawai jyrhoh ba long bih ka Coldrif, u la shah kem ha Chennai ha ki pulit jong ka Madhya Pradesh ha ka miet jong ka sngi Balang. Kane ka dawai, ka don ka jingïadei bad ka jingïap jong ki 20 ngut ki khynnah ha Madhya Pradesh bad Rajasthan.
U Superintendent of Police jong ka Chhindwara, u Ajay Pandey, u ïathuh ba ïa u Ranganathan, la ïalam hakhmat ka kashari jong ka Chennai hynnin ka sngi. Ka jingshah kem jong u kam shym la slem hadien ba la kem ïa u hashwa da ki pulit ka Madhya Pradesh ban tohkit ïa u halor katei ka kam. Katto katne tylli ki jylla ha kylleng ka ri, ki la khang ban die bad sam ïa kane ka dawai jyrhoh.
U Symbud Myntri Rangbah jong ka Madhya Pradesh uba dei ruh u Myntri ka tnat ka koit ka khiah ka jylla, u Rajendra Shukla, u ïathuh ha ka sngi Balang ba 20 ngut ki khynnah, ki la ïap ha katei ka jylla, hadien ba ki la dih ïa ka dawai Coldrif Cough Syrup, katba 5 ngut kiwei pat, ki dang shah sumar.
Ka tnad ka koit ka khiah jong ka sorkar pdeng ka la pynthikna ba ka Coldrif ka don ïa ka Diethylene Glycol (DEG), ka dawai kaba sniew kaba ju pyndonkam ha ki karkhana. Wat tang ka DEG kaba rit ruh ka lah ban pynïap briew. Ki khynnah ki la ïoh ïa ka jingpang khyllai hadien ba ki la dih ïa ka Coldrif.
Ki pulit ki la wad ïa u Ranganathan ha kaba ïadei bad ka jingïap jong ki khynnah kiba ym duna ïa ka arphew ngut kiba la pang hadien ba ki la dih ïa kane ka dawai jyrhoh. La pynbna ïa ka khusnam kaba T.20,000 na ka bynta ban ïohkem ïa u. Kane ka kompeni kaba don ha Chennai ka dang pynpoi ïa ka dawai jyrhoh ‘Coldrif’ sha Puducherry, Madhya Pradesh, Rajasthan, bad katto katne kiwei pat ki thaiñ.
Ha ka 4 tarik u Risaw, ka Food Safety and Drug Administration Department, ka la pynbna ba ïa ki nongmuna jong ka dawai jyrhoh ba la lum na ka jaka shna dawai jong ka kompeni ha Sungwarchatram, Kancheepuram, la lap ba ki dei kiba la ‘pynkylla’. Kham hadien kane, la bthah ïa ka kompeni ban ‘sangeh noh mardor ïa ka jingpynmih ïa ka’.
Ka sorkar Tamil Nadu ka la khang ban die ïa ka dawai ‘Coldrif’ naduh ka 1 tarik u Risaw bad ka la bthah ban weng noh ïa baroh ki stok kiba la don lypa na ka ïew.
