Patna, Risaw:
Ha ka jingpynbna kaba kongsan hashwa ka ilekshon, u nongïalam ka seng Rashtriya Janata Dal (RJD) u Tejashwi Prasad Yadav u la ong ba lada ka kynhun INDIA ba la ïalam da ka seng RJD ka la wan ha ka bor ha Bihar, kan wanrah ïa ka aiñ ban pynthikna ba man la ka longïing ha ka jylla kan don iwei i dkhot i ban ïoh ïa ka kam sorkar.
Haba kren bad ki lad pathai khubor, u Tejashwi u la ong ba ïa kane ka aiñ yn wanrah hapoh 20 sngi naduh ba la thaw ïa ka sorkar bathymmai.
“Ka kynhun NDA kam lah ban ai kam ïa ki samla ha ki 20 snem. Ngin sa wanrah ïa ka aiñ hapoh 20 sngi naduh ba wan ha ka bor bad pynthikna ïa ka jingpyntreikam jong ka hapoh 20 bnai”, u la ong.
U Symbud Myntri Rangbah barim jong ka jylla u la pynpaw ba u la kular ïa ki samla ha ka ilekshon 2020 ruh kumjuh.
“Ha ka jingsynshar kaba 17 bnai jong ka sorkar Grand Alliance, nga la pynthikna ba la pynrung kam san lak ngut ki samla. Lah ban mutdur ba kumno kane ka lah ban long lada nga la ïohpdiang ïa ka jingsynshar kaba san snem pura,” u la bynrap.
U la kam ba kan ym don kawei ruh ka ïing ha Bihar kaba ym don kiba ïoh kam sorkar.
U nongïalam ka RJD u la bynrap ba kane ka dei kawei ka jingkular ha ka thup kaba jrong kaba la thew halor ka jingkular jong ka kynhun ka liang pyrshah sha ki briew hashwa ka ilekshon, ka ban sa long ha ki ar bynta kata ha ka 6 tarik, Naiwieng bad ka 11 tarik, Naiwieng.
“Kane ka dei kaba nyngkong eh na kiba bun ki jingpynbna ngan sa leh hashwa ka ilekshon,” u la ong.
U la ban jur ba ka jingthmu jong u ka long ban ai kam ai jam ïa ki briew jong ka Bihar ban ïa kaba ai ïa ki ïa ka bai bylla, kumba la leh da ka sorkar Nitish Kumar ha ka jylla.
Kum ka jingkynthoh, u Tejashwi u la ong ba ka Bihar kam donkam ïa u Myntri Rangbah uba 75 snem ka rta.
Ïa kane ka jingpynbna jong u Tejashwi la ïohi kum ka jingkynthoh ïa ki jingthmu jong ka kynhun NDA ban pynbiang ïa ki skhim kiba bha.
Ka jingthmu jong ka sorkar ban pynbiang T. 10,000 sha man ki longkmie kiba seng kam lajong haman ki thliew ïing ka la khring ïa ki longkmie ban phai sha ka kynhun kaba bat ïa ka jingsynshar.
Ha ka 27 tarik u Nailur, u Myntri Rangbahduh ka ri u Narendra Modi u la pyllait paidbah ïa ka Mukhyamantri Mahila Rojgar Yojna, ka Scheme bei tyngka ka jylla na ka bynta ki kynthei ha Bihar.
U la sdang ïa ka skhim treikam lyngba ka durkhih kaba wan na New Delhi bad u la pynkylla beit beit ïa ka pisa kaba mar T. 10,000 ha ka Bank Account jong ki 75 lak ngut ki kynthei ha ka jylla ka ban pynlong ïa ka ilekshon.
Nalorkata, u Myntri Rangbah ka Bihar u Nitish Kumar ha ka 3 tarik u Risaw u la phah ïa ka pisa kaba T. 2,500 klur lyngba ka DBT ha ka Bank Account jong ki kynthei ha kylleng ka jylla Bihar, ban pynbiang ka jingai jingïarap pisa kaba mar T. 10,000 hapoh ka jingtreikam jong ka Mukhyamantri Mahila Rojgar Yojna.
