New Delhi, Risaw:
U Myntri ka tnat ki kam poh ïing jong ka sorkar pdeng u Amit Shah, ha ka sngi Palei, u la pynlong ïa ka jingïalang kaba heh bha ban bishar bniah ïa ka jinglong jingman ha Jammu & Kashmir, kaba la pynpaw biang ïa ka jingkut jingmut kaba khlem sangeh ban pynïoh ïa ka thaiñ kaba lait na ki kam pyntriem jong ki lehnoh.
U la bthah ïa ki heh ban pynthikna ba ka jingpyntreikam jong ka sorkar pyrshah ïa ki kam pyntriem jong ki lehnoh ka long kaba la pynskhem bha. U Shah u la kyntu ïa baroh ki kynhun pahara ba kin long kiba husiar bad ïatreilang na ka bynta ban rat dyngkhong ïa ki kam pyntriem jong ki lehnoh na Union Territory.
Katba dang ai jingïaroh ïa ki jingshakri bad ka jingtreikam jong ki bor pahara ha kaba ïaleh pyrshah ïa ki kam lehnoh, u Shah u la ong, “Namar ka jingpyrshang ba la buh ryntih jong ki kynhun pahara, ki lehnoh kiba la nangroi da ki nongshun jong ka jaitbynriew ha Jammu & Kashmir la jan duh”.
U la pynskhem shuh shuh ba ki bor pahara ki don ka jinglaitluid kaba pura ban ïaleh pyrshah ïa ki kam lehnoh namar ki ïohi ba ki long kiba donkam katkum ka jinglong jingman.
Ki tyllong khubor ki la bynrap ba u Shah u la bthah ïa ki kynhun ym tang ban pynduh pyndam ïa ki lehnoh kiba treikam hynrei ban pynduh ruh ïa ka kynhun pyntreikam kaba dang don mynta kaba ju kyrshan na ka bynta jong ki. Kum ka jingtyrwa ba pura na ka sorkar, u Shah u la pynthikna ïa ka jingbteng jong baroh ki jingdonkam ban pynneh ïa ki jingleit thwet bad jingïakhun pyrshah ïa ki lehnoh.
“Ki bor pahara jong ngi kin dang bteng ban leh ïa kano kano ka jingpyrshang kaba pura ban pynthut ïa kano kano ka jingpyntreikam ban buh jingma ïa ka jingsuk bad ka jingshngaiñ ha ka thaiñ,” u la bynrap shuh shuh ba ha ka por ba dang shen, ka jingsynshar jong ka IT, ha ka jingïatreilang bad ki bor pahara, ka la nang jur shuh shuh bad ki bor pahara, ka la nang jur shuh shuh ïa ka jingpynbiang baroh kawei jong ka thaiñ.
Haba pynshai ïa ka jingdonkam jong ki jingpyrshang kiba neh bad kiba ïatreilang haduh ban da pynduh pyndam pura ïa ki kam lehnoh, u Shah u la ong, “Ki kynhun pahara kiba trei ha ka rukom kaba ïadei bad kaba husiar thikna kan pynduh noh ïa ki kam lehnoh na ka thaiñ, bad kaba la nang bteng kumba la leh.”
U la maham ruh ba ryngkat bad ka jingsdang jong ka por Tlang, ki bor pahara ki dei ban long kiba la pynkhreh pura khnang ban khanglad ïa ki lehnoh ban pyndonkam ïa ka jingjam na shiliang sha shiliang khappud.
Ha ka jingïalang ba la pynlong la leit ban ïashim bynta da ki heh nongmihkhmat, kum u Lieutenant Governor Manoj Sinha, Union Home Secretary Govind Mohan, Intelligence Bureau Director Tapan Deka, J&K Police Chief Nalin Prabhat, CRPF Director General G.P. Singh, bad u Director General ka tnat BSF u Daljit Singh Chawdhary.
Shuh shuh, u Shah, ryngkat bad ki heh ruh, u la shim ruh ïa ka stock jong ki kam pynroi kiba dang iaid ha kylleng ka Union Territory. Kaba kham kongsan, la pynlong ïa ka jingïalang bishar bniah kaba kum kata ha kaba ïadei bad ka Jammu & Kashmir khyndiat palat shibnai mynshuwa, ha ka 1 tarik u Naitung.
La pynlong ruh ïa jingïalang halor ki jingpynbeit ryntih na ka bynta ki lad ai jingshngaiñ, khamtam na ka bynta kito kiba don ha bad sawdong jong ka thaiñ Pir Panjal.
