Lucknow, Risaw:
Ka Mayawati, ka heh nongïalam jong seng Bahujan Samaj Party (BSP) ka la pynpaw ïa ka jingmih biang jong ka seng jong ka bad ka la pynbna ïa ka kam saiñ pyrthei jong ka ha ka sngi rakhe ïap jong u nongseng ka seng BSP u President bad nongprat lynti jong ka, u Kanshi Ram ha ka sngi Palei.
Haba ai jingkren ha ka jingïalang kaba heh bha ha ka Ramabai Rally Sthal, kaba la sakhi ïa ki nongkyrshan jong ka BSP na ki phra tylli ki jylla, kynthup ïa ka Bihar, Punjab, bad Haryana, ha kaba la antad ba ki bor ki don haduh 4-5 lak ngut, ka Mayawati ha kajuh ka por ka la ïaroh ïa ka sorkar u Yogi Adityanath bad ka la kynthoh jur ïa ka seng Samajwadi Party (SP) bad ka Congress.
Ka la wer ïa ki nongkyrshan jong ka na ka bynta “ban jied ïa ka sorkar jong ka seng Bahujan Samaj ha u snem 2027.”
Ha ka jingkren kaba pynsawa ka jingsngewrit sha ka jingsynshar ba mynta, ka Mayawati ka la ïaroh ïa ka sorkar u Yogi Adityanath kaba la pynneh pynsah ïa ki jaka sah kynmaw bad ki Park ba la aiti sha ki riewstad bad ki dur jong ki Dalit, kiba la tei ha ka por ba ka dang synshar.
“Nga la thoh sha u Myntri Rangbah ka Jylla ban kyntu ba ïa ka pisa tiket na ki nongwan jngohkai sha kine ki jaka dei ban pyndonkam na ka bynta ban maramot ïa ki. Ka sorkar BJP ka la shim ïa ka sienjam kaba bha bad ka la kit ïa ka jinglut jingsep ban maramot. Na ka bynta kane, nga ai khublei ïa ki”, ka la ong.
Hynrei kynsan kynsan ka la kynthoh pyrshah ïa ka seng Samajwadi Party bad ïa u heh nongïalam jong ka, u Akhilesh Yadav, da kaba kynnoh ba ki long kiba arsap bad “kiba ar jingmut.”
“Haba ki don ha ka bor, ki klet noh ïa u Kanshi Ram ji bad ïa ka mat treikam jong ka PDA (Pichda, Dalit, Alpsankhyak). Hynrei shisien ba la mih na ka bor, ki kynmaw ïa baroh ar. Dei ban pynjngai ïa kum kine ki briew kiba don ar jingmut”, ka la maham ïa ki nongkyrshan jong ka.
Ka heh nongïalam jong ka seng BSP ka la bteng ïa ka jingkren beiñ jong ka ïa ka seng SP da kaba bynrap, “Lada ki nongbud ka seng Samajwadi ki burom haduh katta katta ïa u Kanshi Ram ji, balei ka sorkar jong ki ka pynkylla ïa ka kyrteng jong ka distrik kaba ngi la nam ha ka kyrteng jong u ha ka thaiñ Aligarh?”
Ka la kynnoh ïa ka seng SP ba ka la pynpulom ïa ki jaka treikam bad ki skhim ai jingïarap ba la thaw ha ka kyrteng jong u Kanshi Ram, da kaba khot ïa kane ka jingpynshisha ïa ka “jingmut jingpyrkhat pyrshah Dalit bad jaitbynriew” jong ki.
Ka Mayawati ruh kam shym la pyllait ïa ka Congress, ha kaba ka la kynthoh jur halor ka jingiehnoh beiñ bad ka jingbym ai jingmyntoi ïa ki Dalit.
“Ka Congress kam ju ai khusnam Bharat Ratna ïa u Babasaheb Ambedkar.
Wat ha ka por ba u Kanshi Ram u la khlad noh na kane ka pyrthei, kam shym la pynbna ïa ka sngi ban pynpaw ka jingsngewsih jong ka seng Congress ne ka sorkar SP ha UP.
Kane ka pynpaw ïa ka jingmut jingpyrkhat jong ki,” ka la bteng, da ka jingkynthoh pyrshah ïa ka kynhun.
Shuh shuh ka Mayawati ka la kynnoh ïa ka BJP bad ka Congress ba ki “pyndonkam ïa ki Dalit kum ki vote banks,” da kaba ong ba baroh ki seng kiba pynshong nongrim ha ka jaitbynriew ki la ïateh lok ban khanglad ïa ka jingkiew jong ka BSP.
“Ki la tip ba lada ka BSP ka wan ha ka bor hi dalade ha ki jylla, kan poi sha ka sorkar kmie ruh kumjuh”, ka la ong da kaba pynpaw ïa ka jingkynnoh ba la leh bakla ïa ka EVM bad ki jingïateh lok jong ka jingïasuk.
Haba kdew beit sha u Azam Khan bad u MP ka Nagina, u Chandrashekhar Azad, ka Mayawati ka la pyrshang ban pyndam noh ïa ki jingkynnoh halor ka jingïateh lok kaba lah ban mih.
“Ngam ju ïakynduh ha barieh ïano ïano ruh, man ka por ba nga ïakynduh ïano ïano ruh nga leh da kaba paw” ka la ong da kaba kyntait ïa ki khubor hamsaïa ba u Azam Khan u la pynïasoh sha ka BSP.
Haba shim jingkynthoh ïa u MP ka Nagina, u Chandrashekhar Azad, ka la ong, “Ban ot ïa ki vote jong ka BSP, ki liang pyrshah ki la thaw ïa ki seng kiba rit da kaba pyndonkam ïa ki briew kiba khwan myntoi bad kiba shna pisa.”
“Ki la pyrshang da ki kam baroh ban khanglad ïa ngi, ka kynhun CBI, ki jingkhynra IT, ki mukotduma lamler, ki jingpynbna, hynrei ngin sa kiew biang. Ka thong jong ka BSP ka kham heh ban ïa kano kano kawei pat ka ilekshon,” ka la pynbna.
