Raipur, Risaw:
Ki shipai pahara ha ka Bijapur distrik ha Chhattisgarh ki la kem 8 ngut ki lehnoh Maoist ha ka por ba ki la pynlong ïa ka jingleit khynra lang kaba la pynlong ha ka sngi U Blei.
Ïa kane ka jingkhynra la leh da ki pulit na ka kynhun District Reserve Guard (DRG), Basaguda Police Station, bad ka 168th Battalion jong ka Central Reserve Police Force (CRPF).
Khlem da pynslem hadien ba la ïoh jingtip na ki kynhun wadbniah, ka kynhun ba ïatreilang ka la khanglad ïa ka kynhun lehnoh bad ka la lap ïa ka jaka buh tiar pynbthei bad ki tiar pynbna khubor jong ki Maoist. Ki tiar ba la ïoh kurup ki long ki Tiffin bomb, ki tiar pynbthei, ki Safety fuse, ki Cordtex wire, ki Battery, ki wire elektrik, ki tiar tih khyndew, bad ki Banner kiba thoh ïa ki jingthoh pyrshah sorkar.
Napdeng kine ki 8 ngut kiba la shah kem, lai ngut ki dei kiba la shah thong ha ka khlieh jong ki da ka khusnam lada lah ban ïarap ha ka ban ïohkem ïa ki. U Kosa Sodi u la shah thong ha ka khlieh jong u da ka khusnam kaba T.2 lak katba u Jai Singh Madvi bad u Madkam Anda baroh arngut ki dei ki dkhot jong ka Kamalapur RPC (Revolutionary People’s Committee) CNM (Chetna Natya Manch) ki la shah thong ha ka khlieh jong ki da mar T.50 hajar.
Kiwei pat ki san ngut kiba la shahkem ki dei kiba la tip kyrteng kum u Sodi Hidma, u Muchaki Budhra ba la ju tip ruh da ka kyrteng kum u Bhadra, u Madvi Raju, u Madvi Hidma, bad u Deva Madvi, kine ki dei kiba la don bynta bad ki kynhun lehnoh bapher bapher bad ki kynhun kamai jong ka seng Maoist kaba la shah ñiew beaiñ. Baroh 8 ngut kine ki briew ki dei kiba wan na ka shnong Kamalapur Jonnaguda Para bad Gottum Para shnong kiba don hapoh ka Bijapur distrik.
Hadien ka jingshah kem jong ki, la sdang ïa ka jingtohkit katkum ki kyndon aiñ ha Basaguda Police Station, bad hadien kata la rah ïa kine kiba shah kynnoh ha ka ïingbishar hapoh ka jingshah set phatok jong ka aiñ. Kane ka jingkhynra ka pyni ïa ka jingjop kaba khraw ha ka jingïaid lynti jong ki jingpyrshang ban ïaleh pyrshah ïa ki lehnoh ha ka thaiñ Bastar, kaba la neh slem bha ka jaka ba jur bha ki jingshah thombor ha ki kam pyntriem jong ki lehnoh Maoist.
Ka kynhun lehnoh Maoist, kaba la tip ruh kum ka Maoist movement, ka la khih bha ha ka thaiñ pdeng bad Mihngi jong ka ri India la bun phew snem, ha kaba ka Chhattisgarh, ka dei kawei na ki jylla, kaba la shah ktah bha. Kane ka seng kaba kam ba ka ïakhun na ka bynta ka hok jong ki riewlum bad ka jingsam biang ïa ka khyndew ka shyiap, ka la ju pyndonkam da ki kam thombor, da kaba thmu ïa ki bor pahara bad ki jingtei ne jingshna ba bun.
Ka DRG bad ka CRPF ki la long kiba hakhmat eh ban ïakhun pyrshah ïa ki Maoist, khamtam ha ki jaka ba rben jong ki khlaw jong ka Bastar. Ki jingïohkem kumba long mynta kim pyntlot tang ïa ka jinglah treikam jong ki dkhot ka kynhun Maoist hynrei ki ïarap ruh ban lum jingtip ban ïada na ki jingshah thombor ha ki por ban wan bad ban pyntroiñ ïa ki kynhun jong ki.
