Patna, Risaw:
Hashwa ban pynlong ïa ka dorbar bah jong ka Bihar, ka kynhun NDA ha ka sngi U Blei ka la pynbna ïa ka jingsam ïa ki konstitwensi kaba kynthup ïa ka BJP bad ka JDU ban ïakhun mar katjuh ha ka ilekshon ban wan, katba ka LJP (Ram Vilas) kan ïakhun ha ki 29 tylli ki konstitwensi.
Hangne ka don ka jingkheiñ ïa ki 243 tylli ki konstitwensi kumba la phiah hapdeng ki nongthep vote jong ka NDA, la ïasam da u nongïalam ka BJP ka Bihar, u Vinod Tawde, ha ka jingthoh ha ka Social Media ha ka rynsan X.
Shuh shuh u Tawde u la ong ba baroh ki nongïalam bad ki nongbud jong ka kynhun NDA ki la pdiang sngewbha ïa kane ka rai da ka jingshitrhem bad ki don ka jingngeit skhem ban thaw ïa ka sorkar NDA ha Bihar sa shisien.
Ha kajuh ka por, ka jingïalang jong ka BJP Central Election Committee ka dang ïaid ha ka nongbah jong ka ri. U Myntri ka sorkar pdeng uba dei ruh u National President ka seng BJP u JP Nadda, bad kiwei pat ki Myntri ka sorkar pdeng u Amit Shah, u Rajnath Singh, u Nityanand Rai, u Sarbananda Sonowal bad u Dharmendra Pradhan la ïohi ba ki la poi ha ophis treikam jong ka BJP hangne na ka bynta ka jingïalang jong ka BJP Central Election Committee (CEC).
