Bengaluru, Risaw:
U Myntri ka tnad Primary and Secondary Education u Madhu S Bangarappa u la ong ha ka sngi Saitjaiñ ba ka sorkar jylla shen kan sa pynmih ïa ka jingpynbna ban thung 18 hajar ngut ki nonghikai, ba kynthup ïa 6 hajar ngut ki nonghikai ba shah khot, na ka bynta ki skul ba ai jingïarap bad 12 hajar ngut ki nonghikai na ka bynta ki skul sorkar.
Haba ïashim bynta ha ka prokram ïakren ba la pynlong da ka Shivamogga Press Trust hangne, u la ïathuh ba u la ïoh ban thungkam kumba 13,500 ngut ki nonghikai sha ki skul sorkar ha ki 11 bnai hadien ba u la shimti ïa ka kam.
Yn shah ïa ki nongpynïaid jong ki skul ba ïoh jingïarap ban thung ïa ki nonghikai ba shah khot. Ka tnad ka la kyrpad ïa u Myntri Rangbah ka jylla u Siddaramaiah ban kyntiew ïa ki skul ba la seng da ka ktien Kannada khlem jingïarap kiba la seng hapdeng u snem 1996 bad 2005 kum ki skul ba ïoh jingïarap. Kane kan donkam T.800 klur, u la bynrap. U Madhu u la ong ba shen ka sorkar kan sa pynmih ïa ki jingpynbna na ka bynta ki eksamin TET bad CET.
Ka sorkar kan sdang ïa ki skul ba kyrpang na ka bynta ki khynnah kiba pang bampong hajan Kidwai Cancer Hospital naduh u snem pule ban wan, u la ong. U Myntri u la pynshai ba yn nym khang ïa kano kano ka skul sorkar ha kane ka jylla. Lada jia ba duna ka jingpynrung kyrteng, ïa kata ka skul yn pynïasoh bad kawei ka jaka pule kaba don hajan.
Halor ka jingthmu ban sdang ïa ki klas LKG bad UKG ha ki skul sorkar, u la ong ba ka sorkar kmie ka la bthah ïa ki heh sorkar ban buh pisa na ka bynta jong ka.
Halor ki kam pynroi ba la sdang da u kum u District In-charge Minister, u Madhu u la ong ba la bujli ïa ki khyrdop jong ka pung Bhadra namar ka jingshimkhia jong u. Ym don mano mano ba la pyrshang ha kata ka liang, u la kynnoh.
U Myntri u la ong ba u la ïakren halor ka jingai jaka ïa ki nongrep kiba la duh jaka na ka bynta ka kad liengsuiñ Shivamogga, bad u Myntri ka tnad Housing u Zameer Ahmed Khan. U la ai khublei ïa u Myntri Rangbah uba la mang ïa ka pisa ban shna surok ha Sorab.
Ha kane ka sngi la don lang u President ka kynhun ba ai jingkyrshan u N Manjunath bad u Secretary u Nagaraj Nerige.
